Jambyl oblysy bıyl bolatyn aýyldyq okrýg ákimderin saılaý naýqanyna toqsan paıyz daıyn, dep habarlaıdy Egemen.kz.
Oblystyq saılaý komıssııasynyń tóraǵasy Serǵalı Aıdapkelovtiń aıtýynsha, oblys boıynsha 38 aýyldyq okrýgtegi 93 eldi mekende 89 ýchaskelik saılaý komıssııalary jumys isteıdi. Al, ondaǵy saıası sharalarǵa at salysatyn azamattar sany da naqtylanǵan. Búginde olar qyzý jumysqa kirisip ketti. Sonymen qatar komıssııa tóraǵasy barlyq ýchaskelik saılaý komıssııalarynda arnaıy oqýdan ótken 625 adam jumys isteýde ekenin, al óńirdegi 10 aýdannyń ortalyǵynda 70 adam jumylǵanyn aıtyp ótti.
«Daıyndyq deńgeıimiz joǵary. Búginde ýchaskelik saılaý komıssııalarynyń saılaý kúnine daıyndyǵy 90 paıyzdy qurap otyr. Ýákiletti organdar kezdesýlerdiń kestesin jasady. Jergilikti atqarýshy organdar jáne jergilikti ózin-ózi basqarý organdary kandıdattarǵa saılaýshylarmen kezdesýi úshin sharttyq negizde 71 úı-jaı belgiledi. Jergilikti atqarýshy organdar tıisti saılaý komıssııalarymen birlesip, barlyq kandıdattar úshin úgittik baspa materıaldaryn ornalastyrý úshin 96 oryndy anyqtady. Olardy aýdandyq gazetter betterinde habardar etip, aýdandyq ákimderdiń ınternet-betterinde ornalastyrdy», deıdi Serǵalı Aıdapkelov.
Aıta keteıik, saılaý prosesi bastalǵannan beri oblystaǵy aýyldyq okrýg ákimderine jalpy sany 122 kandıdat usynylǵan. Aýdandyq saılaý komıssııalary 14 shildede 116 kandıdatty tirkegen. Al, 4 kandıdat túrli sebeptermen tirkeýden bas tartqan. Onyń ishinde 2 kandıdat óz kandıdatýralaryn qaıtaryp alý týraly ótinish berdi. Al, 2 úmitkerdi tirkeý týraly sheshimniń kúshi joıylǵan. Sondaı-aq jalpy tirkelgen 116 kandıdattyń ishinde 24 áıel azamattar da bar.