21 shilde men 9 tamyz aralyǵynda Nursultan Nazarbaev halyqaralyq áýejaıynan ushatyn jolaýshylarǵa reısterdiń kelý-ketý ýaqytyn qosymsha naqtylap otyrý qajet, dep habarlaıdy Egemen.kz.
Resmı málimet boıynsha, buǵan osy kezeńde ushý-qoný jolaǵy men jaryq-sıgnaldyq jabdyqtaryn josparly jóndeý jumystary sebepker bolmaq.
«2021 jylǵy 21 shilde men 9 tamyz aralyǵynda áýejaıdyń jumys ýaqyty táýligine 24 saǵattan 17 saǵatqa deıin qysqartylady. Jóndeý jumystary kún saıyn saǵat 11-den keshki 18-ge deıin júrgiziledi. Bul jumystar 1 sáýirden bastap barlyq avıakompanııalarmen aldyn ala kelisildi, soǵan sáıkes olar reıster kestesin ózgertti. Osyǵan baılanysty barlyq jolaýshylardan áýejaıǵa aldyn ala tirkelýge jáne avıakompanııalardyń koll-ortalyqtarynda reısterdiń ushý ýaqyty týraly tolyq aqparatty naqtylaýdy suraımyz», deıdi áýejaı ókilderi.
Áýejaıdyń baspasóz qyzmeti jolaýshylardan atalǵan ózgeristerge túsinistikpen qaraýdy surap otyr. «Ýaqytsha qolaısyzdyqtar sebebinen keshirim suraımyz», delingen resmı habarlamada.