Ile Alataýy taýlaryndaǵy Mánshúk Mámetova shyńyna jalǵyz attanǵan er adam tabyldy, dep habarlaıdy Egemen.kz.
Mınıstrlik málimetinshe, respýblıkalyq jedel-qutqarý jasaǵynyń qutqarýshylary joǵalyp ketken er adamdy M. Mámetova shyńynyń muzdyǵynan tapqan.
«Búgin muzdyqty tekserý kezinde RJQJ qyzmetkerleriniń jaıaý toby er adamdy tapty. Ol qatty tońyp qalǵan, qutqarýshylar oǵan jyly kıim berdi. Medısınalyq kómekke muqtaj bolǵan joq. Búginde RJQJ jedel toby taýdan týrıstpen birge túsip kele jatyr», delingen habarlamada.
Eske salaıyq, 18 shildede týrıst Ile Alataýy taýlarynda joǵalyp ketken bolatyn. Izdestirýdi RJQJ qutqarýshylary alpınızm federasııasynyń alpınısterimen birlesip júrgizdi. Joǵalǵan adamdy izdestirýge «Qazavıaqutqarý» AQ tikushaǵy jumyldyrylǵan.