Reseıdiń Astrahan oblysyndaǵy qandastarymyz ǵana emes, ózge ulttyń ókilderi de qazaqtyń tarıhy men mádenıetine, ónerine qyzyǵýshylyq tanytady. О́ıtkeni atalǵan óńirdiń Volodar aýdanynda qazaqtyń kúı ónerine mol mura qaldyrǵan Qurmanǵazy Saǵyrbaıuly máńgilik tynystaǵan. Al kúı atasynyń shákirti Dına Nurpeıisovanyń Astrahan oblysynda turǵany anyqtalyp otyr.
Astrahan oblysy gýbernatorynyń baspasóz qyzmetiniń málimetine súıensek, Reseı jerin 15 jylǵa jýyq mekendegen kúı anasynyń 160 jyldyq mereıtoıy dúbirletip atap ótilmek. Sol sebepten arnaıy is-sharalar jospary jasaqtalypty. Sonyń biri – Dına Nurpeıisovanyń ómiri men óneri jaıly jańa kitaptyń tanystyrylymy.
– Uly kúıshiniń murasyn nasıhattaǵan biregeı shákirti 1922-1937 jyldary Astrahan oblysynyń birneshe eldi mekeninde turǵan. Onyń ishinde qazirgi Volodar aýdanynyń Kozlov aýyly da bar. Dına ájemiz 1934 jyly Marfın aýylynda ótken kórkemónerpazdar baıqaýynda birinshi júldeni ıelengen. Ony aıǵaqtaıtyn qurmet gramotasy saqtalǵan, – deıdi ólketanýshy Asylbek Sıtalıev.
Onyń aıtýynsha, Astrahan oblystyq memlekettik arhıvinen Dına Nurpeıisovanyń otbasy músheleriniń, tipti sıyr men qoıdyń tizimi kórsetilgen qujat tabylypty. Bul – Marfın aýdanyndaǵy Kozlov aýyldyq keńesiniń arhıvtik anyqtamasy. Sondaı-aq astrahandyqtar shyǵarǵan «Estelik kitabynda» uly Hajen men nemeresi Qojahmettiń 1941 jyly Ekinshi dúnıejúzilik soǵysta habarsyz ketkeni, al jaýyngerlik ordender men medaldarǵa ıe bolǵan úlken uly Jurynbaıdyń 1946 jyly ómirden ótkeni týraly jazylǵan.
Atyraý oblysy