Búgin Qurban aıt meıramyna oraı elorda ákimdigi qaladaǵy muqtaj otbasylarǵa et taratty, dep habarlaıdy Egemen.kz Elorda.info saıtyna silteme jasap.
Elorda ákimdigine qarasty «Astana jastary» resýrstyq ortalyǵynyń bir top volonterleri júk kólikterine tıelgen etti ár aýdanǵa bólip, jumyla jumys istedi.
«Ár aýdandaǵy kómekke muqtaj 100 otbasynyń tizimin aldyq. Ony bizge aýdan ákimdikteri, meshitter, sondaı-aq Jumyspen qamtý basqarmasy usynǵan bolatyn. Volonterlerimiz kómek qolyn sozyp, osynaý ıgi iske óz úlesin qosýǵa tyrysýda. Munda qazir 50 shaqty avtovolonter men 30-dan asa jaıaý volonter qatysyp jatyr. Árqaısysy ózderine júktelgen mekenjaılar boıynsha qurban shalynǵan etti úılerge taratyp shyǵady», deıdi «Astana jastary» jastar resýrstyq ortalyǵy basshysynyń orynbasary Aıan Ermentaev.