Keshe Ortalyq kommýnıkasııalar qyzmetinde Densaýlyq saqtaý mınıstri Alekseı Soıdyń qatysýymen brıfıng ótti. Onda mınıstr KVI boıynsha epıdemııalyq jaǵdaı kúrdeli bolyp otyrǵanyn, birqatar óńirlerdegi kovıdtik stasıonarlarda oryn tolyq ekenin, bul densaýlyq saqtaý júıesiniń shamadan tys júktemesine alyp keletinin málimdedi.
Aldyńǵy eki aptamen salystyrǵanda sońǵy eki aptada respýblıka boıynsha barlyq óńirde syrqattanýshylyqtyń ósýi baıqalǵan. Syrqattanýshylyqtyń ósýi 1,9 eseni qurap otyr. Maýsym aıymen salystyrǵanda ortasha táýliktik syrqattanýshylyq deńgeıi 5,2 ese ósti. 1 shildemen salystyrǵanda elimizde ınfeksııalyq jáne reanımasııalyq tósektik orynmen qamtý 3 ese údemeli túrde óskeni baıqalady, osyǵan baılanysty elimizde tósek qory 1,4 ese ulǵaıtylǵan. Bıylǵy 28 shildedegi jaǵdaı boıynsha respýblıka boıynsha ınfeksııalyq tósektik oryndarmen qamtý 53%-dy, reanımasııalyq tósektik oryndarmen qamtý 43%-dy quraıdy. Almaty, Shymkent qalalarynda, Aqtóbe, Túrkistan jáne Qyzylorda oblystarynda ınfeksııalyq jáne reanımasııalyq tósektik orynmen qamtýdyń joǵary qarqyny baıqalady.
«Qazirgi ýaqytta densaýlyq saqtaý júıesi byltyrǵymen salystyrǵanda eki ese júktememen jumys isteýde. О́tken jyly syrqattanýshylyq táýligine 2 myń adamdy quraǵan bolsa, bıylǵy shilde aıynda syrqattaný deńgeıi 3 eseden astamdy qurap otyr. Emdelip jatqan pasıentterdiń sany da 2 esege artty», dedi A.Soı.
Búgingi kúni elimiz boıynsha 90 myńǵa jýyq adam koronavırýspen aýyryp jatyr. Onyń 25 myńǵa jýyǵy – stasıonarlarda, 65 myńǵa jýyǵy ambýlatorııalyq em alýda. Sonymen qatar shilde aıynyń basymen salystyrǵanda aýyr jaǵdaıdaǵy naýqastardyń sany 2,1 ese ósti, 1 myńǵa jýyq naýqas ókpeni jasandy jeldetý apparattaryna qosylǵan. Mınıstrdiń aıtýynsha, birqatar óńirlerde ınfeksııalyq jáne reanımasııalyq tósektik oryn tapshylyǵy oryn alýy múmkin. Táýekel aımaǵynda Nur-Sultan, Shymkent qalalary jáne birqatar oblystar bar.
«Birqatar óńirlerdiń densaýlyq saqtaý júıesi joǵary júktememen jumys istep jatyr. Búgingi kúni birqatar óńirlerdegi kovıdtik stasıonarlarda oryn tolyq, bul densaýlyq saqtaý júıesiniń shamadan tys júktemesine, halyqqa medısınalyq kómek ýaqtyly jetpeýine jáne syrqattanýdyń ósýine, ınfeksııanyń odan ári taralýyna alyp kelýi múmkin», dep habarlady A.Soı.
Qazaqstan boıynsha jalpy syrqattanýshylyq pen ólimniń 65%-y Nur-Sultan, Almaty, Shymkent, Atyraý, Qaraǵandy qalalarynda tirkelgen. Osyǵan baılanysty 27 shildede Vedomstvoaralyq komıssııanyń sheshimimen atalǵan óńirlerde 2 tamyzdan bastap, karantın sharalary kúsheıtiledi.
Búgingi kúni KVI-ge qarsy vaksınanyń birinshi dozasy árbir ekinshi eresek qazaqstandyqqa egiledi. Vaksınanyń 8,6 mln dozasy paıdalanyldy, onyń ishinde 1-shi komponentimen 5 230 750 adam egildi, bul vaksına alýǵa tıis halyqtyń 52,8%-yn quraıdy.
Ekinshi komponentpen 3 436 617 adam qamtyldy. Egý pýnktterinde shamamen 713 myń birinshi komponent jáne 1 mln 300 myń ekinshi komponent bar. Mınıstr naýqastardyń 99,9%-y vaksınalanbaǵanyn, bul ımmýndaýdyń qaýipsizdigi men tıimdiligin rastaıtynyn atap ótti.
«Sondyqtan árbir qazaqstandyq vaksınalaý týraly sanaly sheshim qabyldaı bilýi kerek. Ár azamat ózin, jaqyndaryn syrqattan qorǵaýǵa múddeli bolyp, ujymdyq ımmýnıtetti kúsheıtýge atsalysýy qajet. Koronavırýstyń turaqty túrde bola beretin mýtasııasy kezinde bul – qorǵanýdyń jalǵyz joly», dedi mınıstr.
A.Soı búgingi kúni vaksınalaý koronavırýstyq ınfeksııadan bolatyn aýyr aǵym men ólimdi boldyrmaýdyń jalǵyz tıimdi ádisi ekenin taǵy da eske saldy.