Bilim jáne ǵylym mınıstrliginiń bastamasymen jasalǵan úkimetaralyq kelisimder sheńberinde qazaqstandyqtar tegin oqı alatyn elder sany artty. Endi qazaqstandyqtarǵa Slovakııa, Ázerbaıjan jáne Vetnam elderi de granttar bóledi.
Osylaısha, 2021 jyly bilim berý salasyndaǵy kelisimder aıasynda memleketter sany 10-ǵa deıin artty. 2019 jyly mundaı tizimde 7 el bolǵan edi. Bizdiń talapkerge grant usynatyn memleketter qatarynda Majarstan, Polsha, QHR, Ýkraına, Belarýs, Qyrǵyzstan jáne Tájikstan bar.
О́tken eki jylda myńǵa jýyq qazaqstandyq osy elderdiń jetekshi joǵary oqý oryndarynda tegin bilim aldy. Bıyl qazaqstandyqtarǵa 500-ge jýyq grant bólindi. Úkimetaralyq granttar aıasynda qazaqstandyqtar bakalavrıat, magıstratýra, doktorantýra, rezıdentýra baǵdarlamalary boıynsha oqı alady.
«Joǵary bilim berý salasyndaǵy halyqaralyq yntymaqtastyq kadrlyq áleýetke oń áserin tıgizdi. Otandyq joǵary oqý oryndarynda bilim berý prosesiniń sapasyn kúsheıtýmen qatar, azamattarymyzdyń álemniń jetekshi joǵary oqý oryndarynda bilim alý múmkindigine ıe bolýy úshin jaǵdaı jasaý qajet. Biz «Bolashaq» baǵdarlamasy boıynsha ǵana emes, úkimetaralyq kelisimder sheńberinde de qazaqstandyqtardy tegin oqytý úshin elder geografııasyn keńeıtip jatyrmyz. Qazaqstanǵa oralǵannan keıin mamandar alǵan bilimderin ózderi eńbek etetin salany damytý úshin qoldanady dep úmittenemiz», dedi Bilim jáne ǵylym vıse-mınıstri Qýanysh Erǵalıev.
2019 jylmen salystyrǵanda konkýrstyq irikteýge qatysýǵa nıet bildirýshiler sany 15%-ǵa ósti. Úmitkerlerdi irikteýdi depýtattar, sarapshylar, ınjenerlik-tehnıkalyq, medısınalyq, gýmanıtarlyq jáne jaratylystaný ǵylymdarynyń ǵalym-doktorlarynan turatyn Táýelsiz komıssııa júrgizedi.
Úkimetaralyq kelisimderdiń operatory – Bilim jáne ǵylym mınıstrliginiń Halyqaralyq baǵdarlamalar ortalyǵy.
Bul rette osyǵan deıin Qazaqstannyń Bilim jáne ǵylym mınıstri men Eýropalyq odaqtyń Qazaqstandaǵy elshisiniń qatysýymen ótken forýmda taraptar bilim berý salasyndaǵy birlesken yntymaqtastyq máselelerin talqylaǵanyn aıta ketken jón.