«Egemen Qazaqstan» gazetinde jaryq kórgen abaıtanýshy-ǵalymdardyń ǵylymı-tanymdyq maqalalary men memleket jáne qoǵam qaıratkerleriniń paıym-pikirleri arnaıy jınaq bolyp jaryqqa shyqty, dep jazady Egemen.kz.
Jınaq «Danalyq darııasy» dep atalady.
Arnaıy kitaptyń tusaýkeseri búgin, Abaı kúninde ótip, jurtshylyqqa tanystyryldy.
Serik Negımov, Erlan Sydyqov, Dáýletkereı Kápuly, Asqar Omarov, Raýan Kenjehan, Amangeldi Keńshilikuly syndy zııaly qaýym ókilderi qatysqan jıynda «Egemen Qazaqstan» AQ Basqarma tóraǵasy Darhan Qydyráli jınaqty shyǵarýdaǵy basty maqsat – Abaıdyń 175 jyldyǵy men 100 jyldyqtary qarsańyndaǵy materıaldardy jınaqtaý bolǵanyn aıtty.
Tusaýkeser rásiminde sóz alǵan L.Gýmılev atyndaǵy EUÝ rektory Erlan Sydyqov Abaı mereıtoıynyń atqarylýynda «Egemen Qazaqstan» gazetiniń orasan eńbegin atap ótti.
«El gazeti ár jyldyń ózindik qorytyndysyn jasap, aıshyqty sátterdi tarıh betine basyp keledi. Byltyrǵy jyl túgeldeı Abaı jylyn, Uly aqynnyń mereıtoıyn óz dárejesinde atqaryp, Prezıdent tapsyrmasyna saı, eń úlken jumys atqarǵan ujym bolatyn bolsa, ol osy – «Egemen Qazaqstan» ujymy der edim. Bir jylda, Abaı jylynda ne atqarylǵanynyń bárin bir kitapqa toptastyrý – úlken ári qajyrly eńbek», dedi EUÝ rektory.
Al fılologııa ǵylymdarynyń doktory, professor Serik Negımov jınaqqa qatysty «Bul – abaıtaný ǵylymyna qosylǵan orasan zor úles, úlken eńbek. Keler urpaq Abaıdyń 175 jyldyq uly toıy qalaı atalyp ótilip, qandaı jumystar atqarylǵanyna tarıhı jaýapty osy jınaqtan taba alady», dep pikir bildirdi.
Aıta keteıik, «Danalyq darııasy» jınaǵy eki bólimnen turady. «Máńgilik mura» dep atalatyn alǵashqy bóliminde ótken ǵasyrdyń 40-50 jyldary, ıaǵnı Abaıdyń 100 jyldyq mereıtoıy qarsańynda «Sosıaldy Qazaqstan» jáne «Sosıalıstik Qazaqstan» gazetterinde jarııalanǵan ádebı-ǵylymı maqalalar, jazba-esseler toptastyrylǵan. Al ekinshi bólimi «Aqyl-oı alyby» dep atalady. Oqyrman bul bólimnen Abaıdyń 175 jyldyq toıy qarsańynda el gazetinde jaryq kórgen ǵylymı-tanymdyq maqalalar men pikirlerdi oqı alady.