Qorǵanys mınıstrligindegi kezekti apparattyq keńeste jaýyngerlik daıarlyq, áskerı bilim berý jáne zań shyǵarý qyzmetine qatysty máseleler qaraldy, dep jazady Egemen.kz vedomstvonyń baspasóz qyzmetine silteme jasap.
Keńeste jaýyngerlik oqý-jattyǵý barysy talqylandy. Josparǵa sáıkes vzvodtardy daıarlaý jáne batalondarǵa baqylaý taktıkalyq-saptyq sabaqtar ótip jatyr. Aldaǵy aptada vzvodtardyń jaýyngerlik oq atýyn uıymdastyrý boıynsha nusqaý berý-ádistemelik sabaqtar jappaı ótkiziledi.
Armııalyq halyqaralyq oıyndarǵa Qazaqstan komandasyn daıarlaý aıaqtalǵany týraly baıandaldy. Saıys nátıjesinde «ArHO – 2021» oıyndarynyń 11 konkýrsynda Qazaqstan Qarýly Kúshteriniń namysyn qorǵaıtyn úzdik áskerı qyzmetshiler iriktelip alyndy. Búgin olarǵa qajetti sanıtarııalyq-epıdemıologııalyq is-shara uıymdastyryldy. Komandalar áskerı-kólik avıasııasynyń ushaǵymen oıyn ótetin jerge jetkiziletin bolady.
Keńeste áskerı bilim berý máseleleri de qaraldy. Qorǵanys vedomstvosynyń áskerı oqý oryndaryna qabyldaý aıaqtaldy. Mandattyq komıssııa sheshimimen Ulttyq qorǵanys ýnıversıtetine - 190 ofıser, Qurlyq áskerleriniń Áskerı ınstıtýtyna - 301 kýrsant, Áýe qorǵanysy kúshteriniń áskerı ınstıtýtyna - 142 adam, Radıoelektronıka jáne baılanys áskerı-ınjenerlik ınstıtýtyna 132 jas qabyldandy.
Ulttyq qorǵanys ýnıversıtetinde Qarýly Kúshterdiń ofıserlerinen basqa, Qazaqstannyń basqa da áskeri men áskerı quralymdarynyń áskerı qyzmetshileri, memlekettik organ qyzmetkerleri de bilim alady. Odan basqa, áskerı joǵary oqý oryndary halyqaralyq ýaǵdalastyqqa sáıkes UQShU elderi úshin de kadr daıarlaıdy. Bıyl Armenııanyń, Qyrǵyzstannyń jáne Tájikstannyń 67 ókili oqýǵa qabyldandy.
Baıandamalarda áskerı ınstıtýt túlekteri tek Qarýly Kúshterge ǵana emes, Memlekettik kúzet qyzmetine, Ulttyq qaýipsizdik komıtetine jáne basqa da organdarǵa qyzmet etýge jiberiletini atap ótildi. Bul oqý sapasyna qosymsha jaýapkershilik júkteıtini anyq. Qazaqstan azamattaryna áskerı bilim berý óteýsiz negizde beriledi. Sondyqtan oqýǵa túsken árbir azamat barlyq oqytý kýrsynan ótip, áskerı oqý ornyn daıarlanǵan maman retinde aıaqtaýǵa tıis.
Sonymen birge, jekelegen oqıǵalar da kezdesedi. Máselen, keıbir alaqol kýrsanttar birinshi kýrsty aıaqtaǵannan keıin azamattyq JOO-nyń ekinshi kýrsyna qaıta qabyldaný maqsatynda áskerı ınstıtýttan shyǵarýǵa ádeıi baıanat jazady. Bul rette zańnamaǵa sáıkes olar oqýǵa jumsalǵan shyǵyndy ótemeıdi. Al bir jyldyq oqý ýaqyty merzimdi áskerı qyzmet retinde esepteledi.
Mınıstr zańnamadaǵy osy olqylyqty joıý máselesin pysyqtaýǵa jáne teris negizder boıynsha nemese óz qalaýy boıynsha JOO-dan shyǵarylǵan kýrsantty merzimdi áskerı qyzmet ótkerý úshin áskerge jiberý, sondaı-aq onyń oqytýǵa jumsaǵan qarajatyn óteýi týraly normany zańdy túrde bekitýge nusqaý berdi.
– Bilim berýge bólingen bıýdjet qarajaty qatań túrde maqsaty boıynsha jumsalýǵa jáne erekshe esepte bolýǵa tıis. Bul jerde qýlyqqa oryn joq, – dep atap ótti general-leıtenant Nurlan Ermekbaev.
Qorǵanys mınıstrliginiń zań shyǵarý qyzmetin júzege asyrý máselesi de talqylandy. Qazirgi ýaqytta normatıvtik quqyqtyq aktilerge áskerı qyzmetke turý jáne áskerı qyzmetshilerdi turǵyn úımen qamtamasyz etýge qatysty ózgeris engizý qarastyrylyp jatyr.
Qorǵanys vedomstvosynyń basshysy zańnamaǵa kez kelgen túzetýdi ázirleý kezinde olardy jan-jaqty, qajet bolǵan jaǵdaıda alqaly túrde múddeli organdar men qurylymdyq bólimshelerdi tarta otyryp qaraýdy tapsyrdy.
– Zań normalary men erejelerin ázirleý kezinde, eń aldymen, olardy qoldanýdaǵy áleýmettik saldardy, onyń áskerı qyzmetshiler men olardyń otbasynyń áleýmettik ál-aýqatyna qalaı áser etetinin eskerý jáne boljaý qajet, – dep atap ótti Qorǵanys mınıstri.
Bas áskerı-medısınalyq basqarma bastyǵy armııadaǵy sanıtarııalyq-epıdemıologııalyq ahýal týraly málimet berdi. Bir apta ishinde COVID-19-dy juqtyrǵandar sanynyń tómendeýi 11%-ti qurady. Birinshi komponentti alǵandar sany 99% kórsetti, jeke quramnyń 95%-i tolyq vaksınasııalandy. Osy jumysty jalǵastyrý tapsyryldy.