Sharyn memlekettik ulttyq tabıǵı parkiniń aýmaǵynda «Tabıǵat taǵdyry bizdiń qolymyzda!» atty ekoreıd ótkizildi, dep jazady Egemen.kz.
Ekoaksııa barysynda aýmaqty tazalaý jumystary júrgizildi. Sondaı-aq, kelýshilerge týrıstik marshrýttarda sanıtarlyq normalar men qaýipsizdik tehnıkasy erejelerin saqtaý týraly túsindirme paraqshasy taratyldy.
Sharaǵa park qyzmetkerleri, Almaty oblysy Uıǵyr aýdandyq polısııa bólimshesi qyzmetkerleri men eriktiler atsalysty. Sondaı-aq Qazaqstannyń Halyq ártisi, ánshi Roza Rymbaeva da qatysty.
«Tabıǵat – bizdiń úıimiz, baılyǵymyz. Adam óz úıin taza ustaıdy, aýlasyn tazalaıdy. Sondyqtan tabıǵatqa da osylaı qaraý kerek», dedi R. Rymbaeva.
«Reıd kezinde týrıstiń belgilenbegen jerge qoqys tastaý faktisi tirkeldi. Inspektor ákimshilik quqyq buzýshylyq týraly hattama jasady. Sonymen qatar, týrısterge saıabaqta ózenge shomylýǵa tyıym salynǵany týraly eskertildi», dep jazady Ekologııa, geologııa jáne tabıǵı resýrstar mınıstrliginiń baspasóz qyzmeti.