Eýroodaq pen 67 memleket Aýǵanstan bıligin «Talıban» qozǵalysy basyp alǵannan keıin birlesken málimdeme jasady, dep habarlaıdy Egemen.kz.
AQSh, EO-nyń Syrtqy ister jónindegi joǵary ókili, Ulybrıtanııa, Kanada, Germanııa, Avstralııa, Polsha, Ýkraına, Ońtústik Koreıa, Afrıka men Latyn Amerıkasynyń keıbir memleketteri elden ketkisi keletinderge múmkindik jasaý kerek ekenin, Aýǵanstan azamattaryna kómektesýge daıyn ekenin bildirdi.
«Aýǵandar men ketkisi keletin sheteldikterge ketýge ruqsat berilýi kerek. Joldar, áýejaılar men shekaralar ashyq bolyp, tynyshtyq saqtalýy tıis. Aýǵan halqy qaýipsiz ómir súrýge laıyq. Biz halyqaralyq qoǵamdastyqta olarǵa kómektesýge daıynbyz», delingen hatta.
Qujatta elder Aýǵanstandaǵy jaǵdaıǵa baılanysty qaýipsizdikti qamtamasyz etý úshin jumys istep jatqandyǵy aıtylǵan. Olar barlyq tarapty sheteldikter men aýǵan elinen ketkisi keletinderdiń qaýipsiz túrde ketýine jaǵdaı jasaýǵa jáne qurmetteýge shaqyrdy. Aýǵanstanda bılikke otyrǵandarǵa adam ómirin qorǵaýǵa, sondaı-aq qaýipsizdik pen qoǵamdyq tártipti tez arada qalpyna keltirýge jaýapty ekenin eskertti.
Eske salaıyq, «Talıban» qozǵalysynyń sodyrlary Aýǵanstannyń astanasy Kabýlǵa kirip, eldegi soǵystyń aıaqtalǵanyn málimdedi. Kabýl áýejaıyna júzdegen adam jınalyp, elden ketýge tyrysty.
Buǵan deıin Prezıdent Qasym-Jomart Toqaev Aýǵanstandaǵy jaǵdaı týraly málimdeme jasaǵan bolatyn. Ol Aýǵanstan Islam Respýblıkasyndaǵy qazaqstandyqtar men dıplomattardyń qaýipsizdigin qamtamasyz etý úshin sharalar qabyldaýdy tapsyrdy. Memleket basshysy Qazaqstan Aýǵanstandaǵy shıelenistiń ýshyǵýyna alańdaıtynyn jáne oqıǵalardyń damýyn muqııat qadaǵalap otyrǵanyn aıtty.
Aıta keteıik, Joǵarǵy Sottyń 2005 jylǵy 15 naýryzdaǵy sheshimine sáıkes, «Talıban» qozǵalysyna Qazaqstanda tyıym salynǵan.