Búgin Almaty oblysynyń ákimi Amandyq Batalovtyń aýyr atletıkadan jazǵy Olımpıada oıyndarynyń qola júldegerleri Zýlfııa Chınshanlo men Igor Sondy qabyldady. Bul týraly oblys ákiminiń baspasóz qyzmeti habarlady, dep jazady Egemen.kz.
Oblys ákimi sportshylardy Olımpıadadaǵy jetistigimen quttyqtap, barlyq qajetti memlekettik qoldaý turaqty túrde kórsetiletinin aıtty.
«Biz óz tarapymyzdan kómektesýdi jáne qoldaýdy jalǵastyramyz. Búgin men sizderdi jetisýlyqtar atynan eleýli jeńispen quttyqtaımyn jáne jańa sport shyńdaryn baǵyndyrýlaryńyzǵa tilektespin», degen Amandyq Batalov sportshylarǵa oblys ákiminiń qurmet gramotasy men páter kiltin tabys etti.
Zýlfııa Chınshanlo úsh bólmeli páterdiń, al Igor Son eki bólmeli páterdiń kiltin aldy. Sportshylardyń jattyqtyrýshylary da marapattaldy. Olarǵa árqaısysyna 2 mıllıon teńgelik aqsha sertıfıkattary tabys etildi.
Olımpıada oıyndarynyń qola júldegeri, aýyr atletıkadan 2019 jylǵy álem chempıonatynyń kúmis júldegeri Igor Son sportshylarǵa kórsetken kómegi men qoldaýy úshin alǵysyn bildirdi.
«Sportshylarǵa barlyq jaǵynan kórsetken kómegi úshin el Prezıdentine shynaıy rızashylyǵymdy bildiremin. Biz óz tarapymyzdan senimińizdi aqtaýǵa bar kúshimizdi salamyz. Alda Azııa oıyndary. Joǵary marapattarǵa ıe bolý úshin belsendi túrde daıyndalatyn bolamyz», dedi ol.
QR eńbek sińirgen sport sheberi, halyqaralyq dárejedegi sport sheberi, Igor Sonnyń jattyqtyrýshysy Vladımır Sedov ta rızashylyǵyn bildirdi.
«Men 13 jyl boıy sport ınternatynda jattyqtyrýshy bolyp jumys istep kelemin. Endi Olımpıada oıyndarynyń qola júldegeri atanǵan taǵy eki tárbıelenýshim bar. Birinshisi - Karına Gorıcheva, qazir Igor. Men buǵan óte qýanyshtymyn. Jattyqtyrýshylar atynan sportshylarymyzǵa jasalǵan jaǵdaı úshin alǵys aıtqym keledi. Biz elge jáne aımaqqa medal ákelý úshin, nátıje úshin jumysty jalǵastyramyz», dedi ol.
«Biz jaqynda Ortalyq Azııada balamasy joq olımpıadalyq basseındi paıdalanýǵa berdik. Qazirdiń ózinde oǵan 850-ge jýyq bala júzýge jazyldy. Bolashaqta olardyń kóbi bizdi jetistigimen, jeńisimen qýantady dep oılaımyn. Elbasynyń respýblıkada 100 sporttyq-saýyqtyrý ortalyǵyn salý týraly tapsyrmasyna sáıkes, oblysta 13 sporttyq-saýyqtyrý ortalyǵy paıdalanýǵa berildi. Taǵy 5-eýi jaqynda beriledi. olardyń bireýi shalǵaıdaǵy Balqash óńirinde. Qazirdiń ózinde paıdalanýǵa daıyn. Bul rette biz sport ǵımarattaryn, materıaldyq-tehnıkalyq bazany retteýge erekshe nazar aýdaramyz. Bunyń bári buqaralyq sportty damytýǵa jáne jańa talanttardy anyqtaýǵa yqpal etip, nátıje beredi», dep qorytyndylady kezdesýdi oblys ákimi Amandyq Batalov.