Aýǵanstan Islam Respýblıkasyndaǵy ahýaldyń shıelenisýine baılanysty Qarýly Kúshterde qyraǵylyqty kúsheıtý boıynsha sharalar qabyldandy. Eń aldymen, bul arnaıy operasııalar kúshterine, maıdan jáne áskerı-kólik avıasııasyna, áýe shabýylyna qarsy qorǵanysqa qatysty bolyp otyr, dep jazady Egemen.kz Qorǵanys mınıstrliginiń baspasóz qyzmetine silteme jasap.
Qorǵanys mınıstri óńirdegi jaǵdaıdy qadaǵalaý jáne taldaý, kúshter men quraldardyń táýliktik kezekshilikti uıymdastyrý boıynsha mindetter qoıdy. Joǵary qyraǵylyqty qamtamasyz etý maqsatynda áskerı qyzmetshilerdiń kezekshilik atqarýy boıynsha júktemeni birdeı bólý qajettiligi atap ótildi.
«Týyndaıtyn syn-qaterdi udaıy baǵalap, qazirgi ýaqytta biz úshin anaǵurlym mańyzdy jáne negizgi kúsh-jigerdi qaıda baǵyttaý kerek ekenin aıqyndaý qajet», dep atap ótti general-leıtenant Nurlan Ermekbaev.
Aldaǵy aptaǵa josparlanyp otyrǵan jaýyngerlik oqý-jattyǵý barysy týraly baıandaldy.
Jaýyngerler 22 tamyzdan bastap «ArHO – 2021» konkýrstaryna qatysa bastaıdy.
Zapastaǵy, ásirese tapshy mamandyǵy bar ofıserlerdi áskerı qyzmetke shaqyrý máselesi kóterildi. Atap aıtqanda, armııanyń epıdemııaǵa qarsy is-sharalarǵa qatysýy zapastaǵy ofıserlerge suranys arttyrdy. Atap aıtqanda, áskerı kafedrada daıyndalatyn jáne ofıser ataǵyn alǵannan keıin armııada qyzmet ótkergisi kelmeıtin áskerı dárigerlerdiń qajet ekenin kórsetti.
Zańnamaǵa áskerı kafedrany bitirýshilerdi áskerı qyzmet ótkerýdi mindetteý boıynsha túzetýler engizý tapsyryldy.
«Barlyq stýdentter men joǵary oqý oryndarynyń basshylary áskerı kafedradanyń – zapastaǵy ofıserdiń áskerı bıletin alý tásili emes, eń aldymen el múddesi úshin Qarýly Kúshterde qyzmet etýge daıyn bolý ekenin túsinýi tıis», dep atap ótti Qorǵanys mınıstri.