Túrkistan oblysynda er adamnan 840 túp jáne 300-ge jýyq sirińke qorabyna salynǵan esirtki tárkilendi, dep habarlaıdy Egemen.kz Polisia.kz-ke silteme jasap.
Túrkistan oblysy Polısııa departamenti Esirtki qylmysyna qarsy is-qımyl basqarmasynyń qyzmetkerleri Jetisaı aýdandyq polısııa bóliminiń polıseılerimen birge esirtki egistigin anyqtap joıdy.
Polıseılerge Jetisaı aýdanynda jergilikti turǵynnyń biri ósirýge tyıym salynǵan ósimdikterdi egip-ósirýmen aınalysady degen habarlama túsedi. Aqparat alysymen polıseıler birden habarlamanyń shynaıylyǵyna kóz jetkizý maqsatynda jedel-izdestirý is-sharalaryn júrgizdi. Jetisaılyq polıseılerdiń jan-jaqty tekserý jumystary nátıjesinde úıiniń aýlasynyń artqy jaǵynda esirtki tektes sora ósimdigin ósirgen jergilikti turǵyndy ustady. Tártip saqshylary kúdiktiniń aýlasynan aıǵaqty zat retinde 840 túp ósip turǵan esirtki zatyna uqsas jasyl tústi, hosh ıisti ósimdikti tárkiledi.Sonymen qatar turǵynnyń ýchaskesinen keptirip jaıyp qoıǵan taǵy da 289 dana sirińke qorabyna salynǵan esirtki zatyna uqsas jasyl tústi, hosh ıisti esirtki zatynyń japyraqtary alyndy.
Jetisaı aýdandyq polısııa bóliminde atalǵan jaıt boıynsha QR QK-niń 300-baby 2-bóliginiń 3-tarmaǵymen (Quramynda esirtki zattar bar, ósirýge tyıym salynǵan iri mólsherdegi ósimdikterdi zańsyz egip-ósirý) tirkelip, tergep-tekserý áreketteri bastaldy. Sotqa deıingi tergep-tekserý barysynda aıǵaqty zat retinde alynǵan esirtkige saraptama taǵaıyndaldy. Saraptama qorytyndysy boıynsha tárkilengen túpterdiń «sora», al sirińke qorabyndaǵy esirtki zatynyń, «keptirilgen marıhýana» ekeni rastaldy.
Al kúdikti er adam qamaýǵa alyndy. Qazirgi tańda is boıynsha tergeý amaldary júrgizilýde.