Sońǵy kezde kedendik bajdar men salyqtardy tóleýden bosatylǵan ýaqytsha ákelingen kólik quraldaryn Qazaqstan aýmaǵyna alyp kelý jaǵdaıy jıilep ketken, dep habarlaıdy Egemen.kz.
Bul týraly QR Memlekettik kirister komıtetiniń baspasóz qyzmeti aqparat taratty.
Atap ótetin jaǵdaı, kórsetilgen avtomashınalardyń basym kópshiligi Eýrazııalyq ekonomıkalyq odaqtyń (EAEO) kedendik aýmaǵyna Mańǵystaý oblysy boıynsha Memlekettik kirister departamentiniń ótkizý pýnktteri arqyly ýaqytsha ákelinip (EAEO taýarlary bolyp eseptelmeıdi), kedendik baqylaýda bolady.EAEO Kedendik kodeksiniń 264-babynyń 6-tarmaǵyna jáne 275-babynyń 2-tarmaǵyna sáıkes ýaqytsha ákelingen kólik quraldary deklaranttyń (ákelýdi júzege asyrǵan tulǵa) is júzinde ıeliginde jáne paıdalanýynda EAEO kedendik aýmaǵynda bolýǵa tıis.
Alaıda, búgingi tańda Qazaqstan aýmaǵyna ýaqytsha ákelingen kólik quraldaryna qatysty kedendik bajdar men salyqtardy tóleýden, kedendik tazartýdan jaltaryp, memlekettik tirkeýge qoıylyp jatqan faktiler anyqtalýda.
Mysaly, jeke paıdalanýǵa arnalǵan sheteldik kólik quraldaryn, shetel azamattary óz kólik quraldaryn ákelgen soń, biraz ýaqyttan keıin QR aýmaǵynan ketip qalyp jatyr (negizinen Grýzııa men Ázirbaıjan azamattary).
«Bul kólik quraldary tıesili kedendik bajdar men salyqtardy tóleýsiz Qazaqstan aýmaǵynda tirkeýge qoıyp, Qazaqstan azamatyna berý maqsatynda EAEO aýmaǵyna ákelingeni týraly paıymdaýǵa negiz bolap otyr.
Memlekettik kirister komıteti kedendik bajdar men salyqtardy tóleýsiz Qazaqstan aýmaǵyna tirkeýge qoıylǵan 156 kólik quralyn anyqtady», delingen habarlamada.
Osyǵan baılanysty, QR MKK Qazaqstandaǵy barlyq azamatqa ýaqytsha ákelingen kólik quraldaryn tek kedendik tazartýdan ótip, kedendik bajdar men salyqtardy tólegennen keıin ǵana satyp alýǵa jáne Qazaqstan aýmaǵynda atalǵan kólik quraldaryn paıdalanýǵa bolatynyn eskertedi.