Batys Qazaqstan oblysynda aqtóbelik alaıaq 82 jastaǵy zeınetkerdiń 1,9 mln teńgesin jymqyryp ketken, dep habarlaıdy Egemen.kz.
BQO polısııa departamentiniń resmı ókili Bolatbek Belgibekovtiń málim etkenindeı, alaıaq áıel ulymen birge Aqtóbe oblysynda ustaldy.
Oqıǵa 23 tamyz kúni Terekti aýdany, Aqjaıyq aýylynda boldy. 1939 jylǵy zeınetkerdiń úıine syǵan áıel kelip, dıagnoz qoıyp beretinin aıtqan. Sosyn oǵan dýa túskenin, túrli aýrýǵa shaldyqqanyn jetkizip, budan aryltatynyn jetkizgen. Sodan keıin zeınetkerdi sıqyrlap, úıdegi barlyq aqshany kórsetýin suraǵan. Aqyry emge zııany tımeýi úshin bul jóninde eshkimge tis jarmaýy kerektigin eskertip, mashınamen taıyp turǵan. Avtokólik rýlinde onyń 23 jasar uly bolǵan.
«Buǵan kúdiktengen zeınetker áıeldiń kúıeýi aqshany taıaý mańdaǵy saýda núktesine baryp teksertken kezde jalǵan bolyp shyqqan. Polıseıler alaıaqtardyń izine beınebaqylaý arqyly tústi. Sol túni olardy departamenttiń krımınaldyq polısııa basqarmasynyń qyzmetkerleri qolǵa túsirdi. Jymqyrylǵan aqshanyń bir bóligi tárkilendi», dedi PD ókilderi.
Qazirgi kezde QR QK 190-babyna (alaıaqtyq) sáıkes sotqa deıingi tergeý amaldary júrgizilýde.