Bıyl kóktemde áskerge shaqyrylǵan 15 myńnan astam azamattyń 76 paıyzy – qazaq. Bul jóninde Ortalyq kommýnıkasııalar qyzmetinde ótken brıfıng barysynda elimizdiń Qarýly Kúshteri Bas Shtaby Uıymdastyrý-jumyldyrý jumystary jónindegi departamentiniń aǵa ofıseri Rýslan Tapashev málimdedi.
Onyń aıtýynsha, merzimdi áskerı qyzmetke shaqyrylǵandardyń qalǵan 13 paıyzy – orys, 2,5-i – ózbek, 1,5 paıyzdan uıǵyr, polıak pen cheshenderge tıesili. Al qalǵan 3 paıyzyn ózge etnos ókilderi quraıdy. Brıfıngte departamenttiń basshysy Sáken Júsipov elimizde ótkizilip jatqan áskerı jıyndardyń Aýǵanstandaǵy oqıǵalarǵa eshqandaı qatysy joq ekenin de aıtyp ótti.
2021 jylǵy kúzgi áskerge shaqyrý naýqanyn uıymdastyrý taqyrybyna arnalǵan brıfıngte departament ókilderi ekinshi jyl pandemııa jaǵdaıynda ótkizilip jatqan áskerge shaqyrý naýqany jaıly keńinen maǵlumat berdi. Memleket basshysynyń 2021 jylǵy 5 aqpandaǵy Jarlyǵyna sáıkes bıyl azamattardy kúzgi merzimdi áskerı qyzmetke shaqyrý is-sharalary 1 qyrkúıekten bastalady. Jyl sońyna deıin jalǵasatyn áskerge shaqyrý naýqany barysynda Qarýly Kúshterdi, basqa da áskerler men áskerı quralymdardy 18 ben 27 jas aralyǵyndaǵy 17 myńǵa jýyq azamatpen tolyqtyrý josparlanyp otyr. Spıkerler azamattardy merzimdi áskerı qyzmetke shaqyrý qoldanystaǵy zańnamaǵa sáıkes júrgiziletinin, bul is-sharalardy negizinen jergilikti atqarýshy organdar uıymdastyratynyn málimdedi. Al merzimdi áskerı qyzmettiń áskerı qyzmetshilerin zapasqa shyǵarý olar áskerge shaqyrylǵan kúnnen bastap 12 aı ótkennen keıin josparly túrde júzege asyrylady. Jalpy, el Prezıdentiniń tapsyrmasyna sáıkes, Qorǵanys mınıstrliginde ótken jyldarmen salystyrǵanda Qarýly Kúshterge áskerge shaqyrylýshylardyń sanyn kezeń-kezeńimen kóbeıtý josparlanǵan.
Áskerge shaqyrý jáne jıyn pýnktterinde koronavırýs ınfeksııasynyń aldyn alýǵa, indettiń taralýyna jol bermeýge erekshe mán berilip otyrǵanyn aıtqan departament basshysy áskerge shaqyrylýshylarǵa PTR zertteýi eki ret júrgiziletinin de habarlady. «Belgilengen sanıtarlyq-epıdemııalyq shekteýlerdi saqtaý, medısınalyq maskalarmen, dezınfeksııalaý quraldarymen qamtamasyz etý – Qorǵanys mınıstriniń udaıy baqylaýynda. Áskerge shaqyrylýshylar men olardyń ata-analary karantındik shekteýlerdi saqtaý qajettigin jete túsingenderi jón. Sebebi bul áskerı ortada indettiń jappaı taralýyna jol bermeýge yqpal etedi», dedi spıker.
Sonymen qatar aldaǵy áskerge shaqyrý barysynda Sıfrlyq damý jáne aeroǵarysh ónerkásibi mınıstrliginiń 1414 qyzmetiniń servısi arqyly áskerge shaqyrylýshylarǵa SMS habarlamalar taratýdy jalǵastyrý josparlanǵan. «Habardar etý prosesinen jeke qarym-qatynas jasaýdy alyp tastaý ınfeksııa juqtyrý qaýpin azaıtady», deıdi departament ókilderi.
Bıylǵy kóktemgi áskerge shaqyrý kezinde merzimdi áskerı qyzmetke áskerge shaqyrýdy keıinge qaldyrý jáne odan bosatý «Elektrondy úkimet» portalynyń «E-lısenzııalaý» memlekettik derekter bazasynyń aqparattyq júıesi arqyly memlekettik qyzmet kórsetý sheńberinde júzege asyrylǵan bolatyn. Mundaǵy basty maqsat – osy baǵyttaǵy sybaılas jemqorlyq táýekelderin azaıtý edi. Osy júıe jóninde tolyqtyryp ótken spıker: «Kórsetilgen memlekettik qyzmetter kórsetý tártibi týraly naqty aqparatty egov.kz saıtynan alýǵa bolady nemese ol týraly arnaıy ázirlengen jadynamany jaqyn jerde ornalasqan kez kelgen jergilikti áskerı basqarý organdarynan ala alasyzdar. Biz jumysty burynǵydaı keri baılanysty kózdeıtin barynsha ashyq formatta jalǵastyramyz. Áskerge shaqyrylýshylar jáne olardyń ata-analary, jýrnalıster men qoǵam ókilderi ózderine qajetti aqparat alý úshin kez kelgen ýaqytta habarlasa alady. Ol úshin árbir Qorǵanys isteri jónindegi departamentte elektrondy poshta jáshikteri jáne áleýmettik jelilerde resmı akkaýnttar ashyldy», dedi ol. Sondaı-aq barlyq aqsha talap etý jáne basqa da sybaılas jemqorlyq kórinisteri boıynsha keńes alý úshin Qorǵanys isteri jónindegi departamentterdiń «Qarýly Kúshter – Adaldyq Alańy» jobalyq keńsesine júginý kerektigin, bolmasa senim telefondaryna habarlasý qajet ekenin aıtty.