Bıznes nysandary tártipke baǵynbaıdy

Monıtorıngtik toptar osy kezeńde karantındik shekteý sharalaryn buzýǵa qatysty 812 hattama túzip, departamentke joldaǵan. Soǵan baılanysty shaǵyn jáne orta bıznes nysandary men jeke tulǵalarǵa Ákimshilik quqyqbuzýshylyq týraly Kodeksiniń 425-babynyń 1-bóligimen 540 aıyppul salynyp otyr. Tamyz aıy bastalǵaly beri júrgizilgen 830 reıd kezinde 3 770 nysan tekserildi. Karantın talabyn buzýshylarǵa qatysty 186 materıal jınaqtaldy.

Atyraý qalalyq ákimdigi bas­pa­sóz qyzmeti taratqan aqpa­rat­­qa súıensek, monıtorıng­tik top­tar 13-19 tamyz aralyǵynda adam kóp jınalatyn 200-ge tarta meıramhana men ózge de nysandarda karantındik shekteý talaby buzylǵanyn anyqtady. Tekserý nátıjesinde «Aı-Jan», «Aısberg», «Aınash», Bellagio Ballroom meıramhanalary, «Orta», «Gadjı 2», Sulo kafe­leri, End ne stimz loýndj bar, SKY BAR túngi klýby, «Meken» demalys orny, «Loto klýb», «Balajan» balalar oıyn saýyq ortalyǵy, Avangard-2 sha­ǵyn aýdandaǵy alkomarket pen S.Beı­barys kóshesindegi 99-úıde eskertýlerdi elemeı, otbasylyq, ózge is-sharalardy ótkizilgeni bel­gili boldy. Bul nysandardyń keı­biri karantın shekteýlerin jú­ıeli túrde buzyp keledi. Son­daı-aq meıramhananyń artqy esi­gi­n­en kirip, qyz uzatý, aýlaǵa toı jasaý, qudalyq ótkizý, as berý, týǵan kún toılaý sııaqty is-sha­ralar azaıar emes.

– Munaıly shahar ákimdigi tarapynan qurylǵan 12 monıtorıng toby adamdar kóp jınalatyn meıramhana men dám­hana­lardy kún saıyn tekse­redi. Mo­nıtorıng toptary sońǵy úsh kúnde 100-den astam oryndy tekserdi. Nátıjesinde, Royal Hall, «Imperator» meıramhanalary, Café inn, Foodline, Ginza, «Aqqaıyń» dámhanalary, Sky bary, Wine Time, «Dónerstan», Neft street food tamaqtaný oryndary men «BR-2» serýendeý kemesinde karantın shekteýi buzylǵan. Al Almaly aýyldyq okrýginde 50-den astam adam jı­nalǵan otbasylyq is-shara toq­tatyldy, – dep habarlady ákim­diktiń baspasóz qyzmeti.

Mundaı derektiń bar ekenin oblystyq polısııa departamenti­niń baspasóz qyzmeti de rastap otyr. Derekke júginer bolsaq, Isataı aýdanynda jeti mobıldi top músheleri ártúrli is-shara, toı túrindegi basqosý ótkizgen 15 derekti tirkedi. Naqtysyn aıtqanda, «Loto klýb» keńsesi men 14 turǵyn úıinde toı-dýman ótkizilgen. Qyzylqoǵa aýdanynda 6 is-shara men 4 toı ótken. Atyraý qalasyna taıaý ornalasqan Damby aýyldyq okrýginde «Adına» meıramhanasynda ótip jatqan úılený toıy toqtatyldy.

О́ziniń de, ózgeniń de ómirine qaýip tóndiretin koronavırýs ınfeksııasy órship turǵan sátte úılený toıyn demalys bazasynda ótkizetinder de bar. Monıtorıng top músheleri Jaıyq ózeniniń jaǵalaýynda ornalasqan Bereke aýylyndaǵy demalys bazasynyń birindegi toıdy dron arqyly anyqtady. Áýeden túsirilgen vıdeoda demalys bazasynyń aýlasynda kóp kóliktiń turǵany baıqaldy. Top músheleri demalys bazasyna barǵanda 90-ǵa jýyq qo­naqtyń qatysýymen úılený to­ıy ótip jatqanyn tirkedi. De­­malys bazasynyń ákimshisi kara­n­tın shekteýine qaramastan sal­ta­­nat­ty is-shara ótetin nysandy jalǵa bergenin joqqa shyǵarmady.

Karantındik shekteý talaby­nyń óreskel buzylýynyń kesiri balalarǵa tıip otyr. Oblystyq sanıtarlyq-epıdemıologııalyq baqylaý departamentiniń bólim basshysy Aısulý Dosqalıevanyń aıtýynsha, byltyrǵy 28 naýryz ben bıylǵy 17 tamyzǵa deıingi aralyqta 14 jasqa deıingi balalar arasynda koronavırýs ınfeksııasyn juqtyrýdyń 3 839, jasóspirimder arasynda 1 242 jaǵdaıy tirkelipti. Qazir qaýip­ti vırýstyń taralýyna baılanysty eń joǵary kórsetkish Aty­raý qalasy men Jylyoı aýdanynda, sondaı-aq Teńiz ken or­nynda baıqaldy. О́zge aýdandar­da koronavırýs ınfeksııasyn juq­tyrýshylar áli azaıǵan joq.

Máselen, 25 tamyzda óńirde 316 naýqas anyqtaldy. Onyń ishinde Atyraý qalasynda – 180, Teńiz ken ornynda 42 naýqas tir­keldi. Al Jylyoı aýdanynda – 22, Isataıda – 20, Inderde – 16, Qur­manǵazyda –12, Qyzylqoǵada – 10, Mahambette – 10, Maqat aýdanynda 4 adamnan qaýipti vırýs­tyń belgisi tabyldy.

– Qazir 8 469 adam úı jaǵ­daıyn­da emdelip jatyr. Aýdan­darda ashylǵan ınfeksııalyq stasıonarlarda – 316, Teńiz ken ornyn­daǵy stasıonarda – 316, mo­dýldik aýrýhanada – 188, №2 oblystyq aýrýhanada – 177, oblystyq aýrýhanada – 111, kardıologııalyq ortalyqta – 100, temir jol aýrýhanasynda 90 naýqas oqshaýlandy. Sondaı-aq ftı­zıo­pýlmanologııa­lyq orta­lyq­ta 59, stasıonarǵa la­ıyq­tal­ǵan jataqhanada 81 pa­sıent em qabyldaýda, – dep málim etti ob­lystyq densaýlyq saqtaý basqar­masynyń baspasóz qyzmetinen.

Infeksııalyq stasıonar­lar­dyń jansaqtaý bóliminde koro­­navırýs ınfeksııasyn juq­ty­ryp, jaǵdaıy nasharlaǵan 101 naý­qas jatyr. Onyń ishinde bir ju­tym aýaǵa zar bolǵan 11 pasıent ókpeni jasandy jeldetý ap­pa­ratyna qosylǵan. Bul bólimdegi júkteme 82,1 paıyzdy qurap otyr.