Elorda polısııasynyń ókilderi 23-29 tamyz aralyǵynda zańsyz qarý saqtaýdyń 8 faktisin tirkedi, dep habarlaıdy Egemen.kz.
Nur-Sultan qalasy polısııa departamentiniń baspasóz qyzmeti taratqan málimet boıynsha 8 faktiniń bári «Quqyqtyq tártip» jedel aldyn alý is-sharasy aıasynda belgili bolǵan.
«Jedel aldyn alý is-sharasy kezinde zańsyz aınalymnan 8 qarý-jaraq alyndy. Bir oıyq jáne 7 tegis uńǵyly qarý tárkilendi. Mysaly, 25 tamyzda 26 jastaǵy turǵynnan tapansha tárkilendi. Tekserý nátıjeleri onyń oq atýǵa jaramdy qysqa uńǵyly atys qarýyn zańsyz saqtap kelgenin anyqtady. Qarý 5,6 mm kalıbrli «revolver» túrinde úıde jasalǵan. Atalǵan fakti boıynsha qylmystyq is qozǵalyp, ustalǵan azamat ýaqytsha ustaý ızolıatoryna qamaldy», dep jazylǵan departamenttiń dereginde.
Sondaı-aq, reıdtik is-shara kezinde elordalyq polısııa qyzmetkerleri jol qozǵalysy erejelerin óreskel buzý faktilerin anyqtap, jolyn kesken.
«Is-shara kezinde kóp páterli jáne jeke turǵyn úılerdiń aýlalarynda quqyqtyq tártipti qamtamasyz etýge erekshe nazar aýdardy. Jańa tirkelgen jáne buryn jasalǵan qylmystardyń izi ashyldy», dep jazady Nur-Sultan qalasy polısııa departamentiniń baspasóz qyzmeti.