QR Indýstrııa jáne ınfraqurylymdyq damý mınıstrligi málim etkendeı, Qazaqstan men Vengrııa arasynda turaqty áýe reısi ashylady, dep habarlaıdy Egemen.kz.
Vedomstvo taratqan aqparatqa sáıkes, 31 tamyzda QR aýmaǵynda koronavırýstyq ınfeksııanyń paıda bolýy men taralýyna jol bermeý jónindegi vedomstvoaralyq komıssııanyń kezekti otyrysy ótip, Qazaqstan men Vengrııa arasyndaǵy turaqty áýe qatynasyn qalpyna keltirý máselesi qaraldy.
«QR IIDM Azamattyq avıasııa komıteti men Vengrııadaǵy QR Elshiliginiń birlesken jumysynyń arqasynda 2021 jylǵy 9 qyrkúıekten bastap Vengrııanyń «Wizz Air» áýe kompanııasy Býdapesht pen Nur-Sultan qalalary arasynda A320 ushaqtarymen aptasyna 1 ret turaqty reısterdi qaıta bastaýdy josparlap otyr. Vengrııaǵa jasalatyn reıster sanyn ulǵaıtý máselesi epıdemıologııalyq jaǵdaıǵa jáne vedomstvoaralyq komıssııanyń tıisti sheshimderine baılanysty qabyldanady», dep atap ótedi mınıstrlikten.
Barlyq reıster sanıtarlyq-epıdemıologııalyq talaptardy qatań saqtaı otyryp jáne áýe kompanııasynyń saıtynda jarııalanǵan kestege sáıkes oryndalady.