Germanııa kansleri Angela Merkel Aýǵanstandaǵy «Talıban» qozǵalysymen kelissóz bastaýǵa shaqyrdy. Germanııa mınıstrler kabınetiniń basshysy jeksenbide Hagende (Soltústik Reın-Vestfalııa) ótken baspasóz máslıhatynda málimdeme jasady, dep habarlaıdy Egemen.kz.
Bul týraly DW.com saıty málimdedi.
«Talıbanǵa keletin bolsaq, árıne, olarmen sóılesýimiz kerek. О́ıtkeni qazir olarmen istes bolýǵa týra keledi», dedi Merkel.
Germanııa kansleriniń aıtýynsha, muqtaj aýǵandardy evakýasııalaý úshin mundaı dıalog qajet. Sonymen qatar Merkel áýejaıdy ashý jaqsy sıgnal ekenin aıtty.
«Biz elden Germanııanyń damýymen baılanysty uıymdarda jumys istegen jáne qazir qaýip tónýi múmkin adamdardy alyp ketkimiz keledi», dep qosty Germanııa úkimetiniń basshysy.
Ol kelissóz Aýǵanstanǵa gýmanıtarlyq kómek jetkizýdi jalǵastyrýǵa múmkindik beretinin aıtty.
Basylym málimetinshe, osy jazda sý tasqynynan zardap shekken Hagenge Merkelmen CDU/CSU blogynan birge barǵan Germanııa kansleri laýazymyna úmitker Armın Lashet te «Talıban» ókilderimen kelissózderdi qoldaıtynyn bildirdi.
Merkeldiń túsiniktemesi Welt am Sonntag gazetinde jarııalanǵannan keıin, onda qozǵalys ókili Zabıhýlla Mýdjahıd bul toptyń «Germanııamen berik jáne resmı dıplomatııalyq qarym-qatynas ornatqysy keletinin» aıtty.
Bul rette Angela Merkel «Talıban» baqylaýyndaǵy Aýǵanstanmen tolyq dıplomatııalyq qarym-qatynasty qalpyna keltirýdi qoldaıtyny týraly eshteńe aıtqan joq.