Tashkentte Halyqaralyq Túrki akademııasy Álisher Naýaıdiń týǵanyna 580 jyl tolýyna oraı akademııada jaryq kórgen uly aqynnyń kitaptarymen tanystyrdy, dep habarlaıdy Egemen.kz.
«Hamsa» kitabyn ózbek tilinen qazaq tiline belgili qazaq aqyny, Memlekettik syılyqtyń laýreaty, Qazaqstannyń eńbek sińirgen qaıratkeri, «Parasat» ordenimen marapattalǵan Nesipbek Aıtuly aýdarǵan. Kitapqa Á.Naýaıdiń «Láıli – Májnún» jáne «Eskendir qabyrǵasy» atty eki poemasy engen. «Naýaı Álisher. Muhákámátul-lýǵátán» kitabyn qazaq tiline shyǵystanýshy ǵalym Tóráli Qydyr aýdarǵan. Álisher Naýaıdiń bul týyndysy túrkologııada erekshe oryn alady. Aqyn túrki jáne parsy tilderiniń tabıǵatyn tereń zerttep, óz shyǵarmalarynda naqty mysaldar arqyly túrki tiliniń baılyǵy men poetıkalyq kúshin aıqyn kórsetti.
Kitapqa Álisher Naýaıdiń ázirbaıjan, bashqurt, qazaq, qaraqalpaq, qyrym-tatar, qyrǵyz, saha, tatar, túrikmen, ózbek jáne uıǵyr tilderindegi tańdamaly shyǵarmalary engizilgen. Kitapty ózbek ǵalymy Muhammed Álı qurastyrǵan.
«Uly Túrki aqyndary men oıshyldary týraly sóz qozǵaǵanda birden Mahmud Qashqarı, Júsip Balasaǵun, ál-Farabı, Nızamı, Abaı beıneleri paıda bolady. Árıne, túrki áleminiń kórnekti tulǵalary arasynda Álisher Naýaı qurmetti oryn alady, onyń shyǵarmalarynda halyq danalyǵyna enip, qazirgi urpaqqa úlgi bolyp tabylatyn úlken mazmun bar», dedi Halyqaralyq Túrki akademııasynyń prezıdenti Darhan Qydyráli quttyqtaý sózinde.
Qazaqstannyń О́zbekstandaǵy elshisi Darhan Satybaldy mádenı-gýmanıtarlyq yntymaqtastyqqa erekshe kóńil bólinetin ózbek-qazaq dostyq qatynastarynyń, tatý kórshilik pen strategııalyq áriptestiktiń qazirgi joǵary deńgeıin atap ótti.
«Búgingi is-shara ádebıet pen óner salasyndaǵy baýyrlastyq pen yntymaqtastyqtyń kezekti dáleli bolyp tabylady. Uly aqynnyń kemeńger týyndylary elderimiz arasyndaǵy ádebı baılanystardyń altyn kópirine aınalatyny sózsiz», dep atap ótti qazaqstandyq dıplomat.
Is-shara aıasynda baýyrlas elder arasyndaǵy yntymaqtastyqqa qosqan úlesi úshin Túrki akademııasynyń kúmis medalimen «Álisher Naýaı. Baqo gýlı» kitabynyń avtory Muhammed Álı, sondaı-aq Abaıdyń «Qara sózderin» ózbek tiline aýdarǵan Kozokboı Iýldashev pen Ibodýlla Mırzaev marapattaldy.