Fýtzaldan Qazaqstan quramasy álem chempıonaty aıasynda ekinshi jeńisine qol jetkizdi, dep habarlaıdy Egemen.kz Prosports.kz portalyna silteme jasap.
Qazaqstandyq fýtzalshylar toptyq kezeńdegi ekinshi matchynda týrnır qojaıyny Lıtvamen kezdesti. Matchtyń 23-sekýndynda Taınan esep ashty. Bul bıylǵy álem chempıonatyndaǵy eń jyldam gol bolyp tirkeldi.
Úziliske deıin esep ózgergen joq. Al ekinshi taımda qazaqstandyqtar taǵy eki gol soqty. Aldymen Dáýren Tursaǵulov kózge tústi. Keıin Albert Aqbalyqov jaqyn buryshty dál kózdedi. Qorytyndy esep - 3:0, Qazaqstan quramasy úsh upaı enshiledi.
Endi Qazaqstan 18 qyrkúıekte Venesýela quramasymen kúsh synasady. Bul oıynda jeńiske jetse, komanda toptan birinshi orynmen shyǵady.