Sanaýly kúnderden keıin, dálirek aıtsaq osy jyldyń 1 qazanynda Dýbaıda EHRO-2020 dúnıejúzilik kórmesi ashylady. Jer-jahan kóz tigip otyrǵan aıtýly sharaǵa Qazaqstan da qatysady. Bul Taıaý Shyǵys aımaǵynda uıymdastyrylyp otyrǵan alǵashqy dúnıejúzilik kórme.
EHRO-2020 kórmesi byltyr ótýi kerek edi. Alaıda koronavırýs pandemııasyna baılanysty sharanyń merzimi bir jylǵa shegerildi. Kórmeniń uıymdastyrý komıteti habarlaǵandaı, oǵan álemniń 192 eli qatysady. Keler jyldyń 31 naýryzyna deıin jalǵasatyn kórmeni shamamen 25 mln adam tamashalaıdy dep kútilýde. Olardyń 20 paıyzyn bıznes ókilderi quramaq. 182 kúnge sozylatyn sharaǵa kelýshilerdiń 70 paıyzy sheteldik týrıster bolmaq. Kórmeniń jalpy aýmaǵy 438 gektar jerdi alyp jatyr. Kórme Dýbaı men Abý-Dabı qalalarynyń aralyǵynda ornalasqan.
Tańdalǵan taqyryp – «Aqyl-oıdy biriktire otyryp, bolashaqty qalyptastyrý». EHRO-2020 úsh salalyq taqyrypqa bólingen – «Múmkindikter», «Mobıldilik» jáne «Turaqty damý». Alǵashqysy adam áleýetin damytý, tulǵalyq ósý, ınnovasııalardy ilgeriletý jáne jumyspen qamtý sekildi baǵyttardy qamtıdy. «Mobıldilik» taqyrybyna fızıkalyq utqyrlyq, aqparattyq tehnologııalardy taratý, taýarlar men resýrstardy bólýge qol jetkizý baǵyttary tán. «Turaqty damý» – ekojúıeniń jaıly ómir saltyna, tabıǵı resýrstardy utymdy paıdalanýǵa áseri.
QazExpoCongress ulttyq kompanııasy» aksıonerlik qoǵamynyń habarlaýynsha, Qazaqstannyń ulttyq pavılony «Múmkindikter» salalyq taqyrybynda ornalasqan. Oǵan jaqyn mańda Birikken Arab Ámirlikteri, AQSh, Shveısarııa, Qytaı Halyq Respýblıkasy, Aýstrııa, Japonııa, Úndistan, Saýd Arabııasy Koroldigi, Belarýs sekildi memleketterdiń pavılondary, sondaı-aq Emirates Airlines, DP World, ENOC sekildi alpaýyt kompanııalardyń korporatıvtik pavılondary ornalasqan.
Pavılon beınesi dástúrli shyǵys sáýletinen shabyt alǵan zamanaýı sıfrly sheshimder men dástúrlerdiń sıntezin, sondaı-aq Qazaqstannyń ashyqtyǵyn beıneleıdi. Pavılon 3 qabattan turady. Eki qabatynda 4 kórme aımaǵy bar. Pavılon aýmaǵy – 3 400 sharshy metr. Ol orta sanattaǵy pavılondarǵa jatady.
1 qazanda kórmeniń saltanatty ashylý rásimi ótedi. Qazaqstannyń ulttyq pavılony da sol kúni kelýshilerdi qabyldaı bastaıdy. Kórme aıasynda 1 jeltoqsanda Qazaqstan Respýblıkasynyń Ulttyq kúni ótedi. Sonymen qatar shara barysynda elimizdiń Táýelsizdik kúnine jáne Naýryz meıramyna erekshe basymdyq beriledi.
Dúnıejúzilik kórme ındýstrııalandyrýdyń sımvoly sanalady. Muny tehnıkalyq hám tehnologııalyq jetistikterdi pash etetin ashyq alań dese de bolady. EHRO kórmeleriniń aýqymy, uzaqtyǵy jáne kelýshiler sany boıynsha halyqaralyq is-sharalar arasynda teńdesi joq. Bul memleketterdi, kompanııalardy, halyqaralyq uıymdar men azamattardy baılanystyratyn býyn ispetti.
1928 jyly halyqaralyq kórmelerge qatysty Konvensııaǵa qol qoıyldy. Sol sátten bastap Halyqaralyq kórmeler bıýrosy kórmelerdi ótkizýdi retteıtin organ sanalady. Alǵashqy dúnıejúzilik kórme 1851 jyly Londonda uıymdastyrylǵan.
Kórmeniń eki túri bar – dúnıejúzilik jáne mamandandyrylǵan. Olar 3 aıdan 6 aıǵa deıin sozylady. Dýbaıda bıyl ótetin EHRO-2020 dúnıejúzilik kórmege jatady. Al 2017 jyly Nur-Sultanda uıymdastyrylǵan EHRO-2017 – mamandandyrylǵan kórme. Dúnıejúzilik kórme bes jyl saıyn ótkiziledi. Dúnıejúzilik kórmemen salystyrǵanda mamandandyrylǵan kórmeniń jalpy quny tómen ári kólemi de áldeqaıda kishirek.
Dúnıejúzilik kórmeni sońǵy ret 2015 jyly Mılan (Italııa) qabyldady. Endigi kezek – Dýbaıda. 2025 jylǵy kórme Japonııanyń Osaka qalasynda ótpek. 2020 jylǵy kórmeni ótkizýge Dýbaıdan bólek, Ekaterınbýrg (Reseı), Izmır (Túrkııa) jáne San-Paýlý (Brazılııa) qalalary úmitker boldy. Halyqaralyq valıýta qorynyń boljamynsha, Dýbaıdaǵy kórme eldiń ishki jalpy ónimine oń áser etpek. Sondaı-aq 277 myń jańa jumys orny qurylady dep kútilýde.