Almaty oblysynyń Tótenshe jaǵdaılar departamentine qurǵaq shóptiń órtengeni týraly habar túsken, dep habarlaıdy Egemen.kz Almaty oblystyq TJD baspasóz qyzmetine silteme jasap.
Oqıǵa Almaty oblysy, Qarasaı aýdany, «Ile-Alataý» MǴО́K aýmaǵyndaǵy, Aqsaı shatqalynan 8 shaqyrym jerdegi «Radýga» saıajaıynda bolǵan.
Aldymen 3 ga aımaqty alyp jatqan aǵashtar órtene bastady. О́rt shyqqan jerge dereý Almaty oblysy TJD men Aqsaı orman sharýashylyǵynyń kúshteri men quraldary jiberildi.
«28 qyrkúıek kúni saǵat 09:30-daǵy jaǵdaı boıynsha shatqaldan áli de tútin shyǵyp jatyr. Qazirgi tańda QR TJM «Qazavıaqutqarý» AQ tikushaǵy órt jerinde sý shashyp jatyr. TJD kúshimen jaqyn mańdaǵy aýdandyq bólimshelerdiń qyzmetkerlerinen, jergilikti atqarýshy organdardyń qyzmetkerlerinen qosymsha toptar quryldy. Shtab Almaty oblysy TJD bastyǵy Asqat Toıchýbekovtyń basshylyǵymen uıymdastyryldy. Aerovızýaldy baqylaý úshin ushqyshsyz ushatyn apparaty bar jedel top-dron jiberildi», delingen habarlamada.
О́rtti sóndirýge Almaty oblysy TJD 7 tehnıkasy men 25 qyzmetkeri, Aqsaı orman sharýashylyǵynyń 70 qyzmetkeri men 15 tehnıkasy, QR TJM 28237 á/b 50 áskerı qyzmetkeri men 2 tehnıkasy, Qazavıaormanqorǵaý 10 qyzmetkeri men QR TJM «Qazavıaqutqarý» AQ tikushaǵynyń 1 borty jáne 4 ekıpaj adamy jumyldyryldy.