Nursultan Nazarbaev qory janyndaǵy Memlekettik tildi damytý qory «Uly dalanyń ańyzdary» komıkster toptamasynyń tusaýkeserin ótkizdi, dep jazady Egemen.kz.
«Uly dalanyń ańyzdary» komıkster toptamasyna «Eńlik-Kebek», «Estaı-Qorlan», «Qozy Kórpesh–Baıan sulý», «Jumbaqtas», «Aısha bıbi», «Shaıtankól», «Balqash» týyndylary engen.
«Joba Elbasynyń «Uly dalanyń jeti qyry» baǵdarlamalyq maqalasyn iske asyrý aıasynda qolǵa alynǵan. Bul jolǵy toptamaǵa qazaq dalasyndaǵy jeti lıro-epostyq jyr men batyrlar týraly ańyzdy ózek etip aldyq. Maqsatymyz – qazaqtyń tól folkloryn jas býynǵa zamanaýı tásildermen meńgertý. Mysaly, «Qozy Kórpesh – Baıan sulý» eposynyń 89 betke sozylatyn nusqasy bar. Ony qazirgi balalar oqyp otyrmaıtyny túsinikti. Sony bizdiń jas aqyn-jazýshylar qysqasha mazmundap, eń negizi tustarynan dıalogtar qurap, komıkske ıkemdep jazyp shyǵady. Sýretshiler sonyń jelisimen komıks salady. Ázirge komıks ssenarıin Dosqan Jylqybaev degen jigit jazyp júr. Al sýretterin áýeldi Murat Dilmanov salyp bastaǵan. Qazir oǵan eki jas sýretshi qosyldy», deıdi Nursultan Nazarbaev qory janyndaǵy Memlekettik tildi damytý qorynyń dırektory Azat Sháýeev.
Sondaı-aq ol bir erteginiń komıksi birden úsh tilde berilgenin aıtty. Sonymen qatar «Uly dala handary» jáne «Uly dalanyń arýlary» degen toptamalar josparda bar eken. Onda Tomırıs pen Zarınadan bastap Álııa, Mánshúkterge deıingi tulǵalar qamtylady.
Komıkstiń elektrondy nusqasy arnaıy saıtta tegin usynylady. Al úsh tildegi jınaq satylymǵa shyǵady.