QR Premer-Mınıstri Asqar Mamın Alstom fransýz mashına jasaý konserniniń dırektorlar keńesiniń tóraǵasy Anrı Pýpar-Lafarjben kezdesý ótkizdi, dep habarlaıdy Egemen.kz Premer-Mınıstrdiń baspasóz qyzmetine silteme jasap.
Taraptar temirjol tehnıkasy – elektrovozdar men baǵyttamaly jetekterdi óndirý jáne olarǵa servıstik qyzmet kórsetý boıynsha yntymaqtastyqty keńeıtýdiń jaı-kúıi men perspektıvasyn talqylady.
Kelissóz barysynda Alstom-nyń Qazaqstandaǵy qurastyrýshy óndirisin oqshaýlaý deńgeıin 2021 jyly 38%-dan 2025 jyly 50%-ǵa deıin ulǵaıtý máselesine erekshe nazar aýdaryldy. Aqshalaı máninde oqshaýlaý jylyna 5 mlrd teńgeni quraıdy. Bul rette kompanııa atalǵan ýaqytqa deıin qazaqstandyqtar arasynan 700 joǵary bilikti ınjener daıyndaıdy, sondaı-aq QR temirjol ınfraqurylymyn sıfrlandyrý jobalaryn iske asyrýǵa qatysady.
Alstom – energetıkalyq jabdyqtar men temirjol kóligi óndirisindegi álemdik kóshbasshylardyń biri. Qazaqstanda 2010 jyldan beri jumys isteıdi, 950-den astam qyzmetkeri bar. Qazirgi ýaqytta QR-ǵa 100 mln eýrodan astam ınvestısııa saldy. Nur-Sultan qalasynda elektrovozdar shyǵarý jáne olarǵa tehnıkalyq qyzmet kórsetý boıynsha «Elektrovoz Qurastyrý Zaýyty» (EKZ) jáne Almaty qalasynda baǵyttamaly jetekter óndirý boıynsha «KazElektroPrıvod» (KEP) birlesken kásiporyndary, úsh servıs deposy jáne bir servıs ortalyǵy jumys isteıdi.
Alstom – Ortalyq Azııa men Kavkaz aýmaǵynda elektrovozdar men baǵyttamaly jetekterdiń birden-bir óndirýshisi, sondaı-aq osy aımaqtaǵy temirjol ónerkásibin jańǵyrtý baǵdarlamasynyń negizgi qatysýshysy.
Kezdesýge ındýstrııa jáne ınfraqurylymdyq damý mınıstri Beıbit Atamqulov, «Samuryq – Qazyna» AQ basqarma tóraǵasy Almasadam Sátqalıev, «Qazaqstan Temir Joly» UK» AQ basqarma tóraǵasy Nurlan Saýranbaev qatysty.