2021 jylǵy 18-22 qazan aralyǵynda óńirde «Áskerge shaqyrylýshy» jedel aldyn alý is-sharasy ótkizildi, dep habarlaıdy Egemen.kz.
Bul týraly Pavlodarnews.kz málim etti.
Oblystyq polısııa departamenti baspasóz qyzmetiniń málimetinshe, barlyq shaqyrylýshylar 441 turǵylyqty jeri boıynsha tekserildi, 1593 izdeýde júr jáne 148 adam Qazaqstan Respýblıkasynyń basqa óńirlerinde anyqtalǵan, olarǵa habarlama jiberildi.
«Áskerı mindet – Qazaqstan Respýblıkasynyń árbir azamatynyń óz elin qorǵaý jónindegi mindeti jáne qasıetti boryshy. Áskerge shaqyrylýshylardyń armııada qyzmetten jaltarýy ózekti bolyp qalýda, óıtkeni kúzgi shaqyrý barysynda qyzmetke jaramdy dep tanylǵan keıbir jastar áskerı qyzmetten jaltarýdy jalǵastyrýda. Tártip saqshylary qyzmetten jaltaryp júrgen 24 adamdy óńirdiń qorǵanys bólimderine jetkizdi. Mysaly, Novochernoıarka aýylynyń 21 jastaǵy turǵyny tirkelgen jerinde turmaıtyn bolyp shyqty. Jas jigittiń anasymen birge turatyn dámhanalardyń birinde ot jaǵýshy bolyp jumys isteıtini anyqtaldy. Ol óziniń bul áreketin áskerge barǵysy kelmeıtinimen túsindirgen», dep habarlady departamentte.
Sondaı-aq Rojdestvenka aýylynyń 20 jastaǵy turǵyny Pavlodar qalasynda anyqtalsa, Birlik aýylynyń 23 jastaǵy turǵyny Ekibastuz qalasynan tabylǵan. Qazirgi ýaqytta jastar medısınalyq tekserýden ótýde.
Aıta keterligi, áskerı mindetti oryndaýdan, alǵashqy áskerı esepke qoıýǵa jáne áskerı qyzmetke shaqyrýǵa baılanysty is-sharalarǵa qorǵanys isteri jónindegi bólimge, shaqyrý komıssııasyna kelýden, áskerlerge jóneltýden jáne medısınalyq tekserýden ótýden jaltarǵan azamattar izdestiriledi. Áskerı esepten shyqpaǵan jáne jańa turǵylyqty jeri boıynsha áskerı esepke ýaqytyly turmaǵan azamattar da izdestirilýde.
Osyǵan baılanysty áskerı esepke alý qaǵıdalaryn buzǵan, áskerı qyzmetke shaqyrýdan jaltarǵan azamat ákimshilik jaýaptylyqqa tartylady.