Pavlodarda aýa raıynyń nasharlaýyna baılanysty bir kún ishinde 35 jol-kólik oqıǵasy tirkeldi, dep habarlaıdy Egemen.kz.
«2 qarasha kúni saǵat 14:10-da Pavlodarda PMHZ avtojolynda «Shkoda Sýberb» markaly avtokóliginiń 43 jastaǵy júrgizýshisi «Folksvagen Golf» markaly avtokóligimen soqtyǵysqan. Jol apaty saldarynan «Folksvagen Golf» avtokóliginiń 19 jastaǵy júrgizýshisi jaraqat alyp aýrýhanaǵa jetkizildi», dep habarlady Pavlodar oblystyq polısııa departamentiniń baspasóz qyzmeti.
Quqyq qorǵaý organdarynyń málimetinshe, «Shkoda Sýberb» avtokóligi aıyp turaǵyna qamaldy. Tekserý júrgizilip, qajetti saraptamalar taǵaıyndaldy.
«Aýa raıynyń qolaısyzdyǵyna baılanysty 2 qarashada Pavlodarda 35 JKO tirkeldi», dep tolyqtyrdy PD.
Tártip saqshylary avtokólik júrgizýshilerine aýa raıynyń nasharlaýyna baılanysty jolda abaı bolýdy eske saldy.
«Jyl basynan beri Pavlodar oblysynyń aýmaǵynda 529 JKO tirkeldi, sonyń nátıjesinde 47 adam qaza tapty, taǵy 789 adam jaraqat aldy», dep habarlady vedomstvodan.