Ishki ister mınıstrligi Aqmola jáne Qostanaı oblystarynyń Mamandandyrylǵan halyqqa qyzmet kórsetý ortalyqtarynda myńnan astam adam júrgizýshi kýáligin satyp alǵany týraly aqparatqa oraı málimdeme jasady, dep habarlaıdy Egemen.kz Polisia.kz saıtyna silteme jasap.
«Eki jyldan astam ýaqyttan beri polısııa júrgizýshilikke úmitkerlerden teorııalyq jáne praktıkalyq emtıhandardy qabyldaýǵa qatyspaıdy. Polısııa qyzmetkerleri vedomstvolyq esepke alý boıynsha júrgizýshi kýáligin alýǵa úmitkerlerdi júrgizýshi kýáliginen aıyrý jáne basqa da málimet alý turǵysynan ǵana tekserýdi júzege asyrady», dedi IIM Ákimshilik polısııa komıtetinen.
Vedomstvo málimetinshe, bul júrgizýshi kýálikterin berý kezinde azamattardyń polısııamen baılanysyn azaıtý jáne sybaılas jemqorlyq faktilerin boldyrmaý úshin jasaldy. Nátıjesinde sońǵy úsh jylda polısııa qatarynda sybaılas jemqorlyq qylmystarynyń sany 43% tómendedi.
«Jol erejesin bilmeıtin júrgizýshiler azamattarǵa aıtarlyqtaı qaýip tóndiredi. Sondyqtan kólik tizginine otyrǵysy keletinder olarǵa júkteletin jaýapkershilikti sezinýi kerek. Azamattardan jolda saq bolyp, jol erejesin qatań saqtaýdy suraımyz», dedi polısııada.
Eske salaıyq, keshe QR Sybaılas jemqorlyqqa qarsy is-qımyl agentigi Qostanaı jáne Aqmola oblystarynda Mamandandyrylǵan halyqqa qyzmet kórsetý ortalyqtarynda júrgizýshi kýálikteri zańsyz berilip kelgeni týraly habarlady.
«Júrgizýshi kýáliginen úmitti azamattardyń ornyna emtıhandy arnaıy daıyndalǵan tulǵalar tapsyryp otyrǵan. Mysaly, Aqmola oblysynda arnaıy daıyndalǵan adamdar emtıhan kompıýterlerine qashyqtan qol jetkizip, bógde azamttardyń ornyna durys jaýabyn belgilep otyrǵan.
Al Qostanaı oblysynda arnaıy daıyndalǵan adamdar medısınalyq maska men bas kıimniń kómegimen bet álpetin tumshalaý arqyly ózge azamattardyń ornyna kirip kelgen. Tergeý barysynda 1 myńnan astam júrgizýshi kýáligin zańsyz berý faktileri tekserilip, emtıhannan sátti ótkeni týraly berilgen jalǵan anyqtamalar qaıtaryldy», dep jazylǵan agenttik málimetinde.