Serbııa astanasy Belgrad qalasynda ótip jatqan álem chempıonatynyń jartylaı fınalyna jetken qazaq boksshylarynyń qarsylastarynyń áleýeti qandaı? Bizdińshe birneshe boksshymyz fınalǵa shyǵatyn sekildi, dep habarlaıdy Egemen.kz.
Temirtas qarsylasyn jeńe ala ma?
Birinshi bolyp sharshy alańǵa kóteriletin 48 kılo salmaqtaǵy úkili úmitimiz Temirtas Júsipovtiń fınalǵa shyǵýǵa múmkindigi mol. Bul álem chempıonaty Temirtas úshin sońǵy jarys bolýy yqtımal. 33 jastaǵy tájirıbeli boksshy muny jaqsy túsinedi. Onyń qarsylasy – Belarýs boksshysy Iohanı Karmelchýk. Árıne, jartylaı fınalǵa jetken Belarýs boksshysy ońaı shaǵylatyn jańǵaq emes. Alaıda talaı jarysta shyńdalǵan Temirtas barlyq tehnıkalyq arsenalyn kórsetip, qajet kezde ekinshi nómirde judyryqtasyp, jeńiske jetedi degen oıdamyz. Bir anyǵy Temirtas Júsipov Belgradtan altynmen qaıtýǵa bar kúshin salady. Buıyra ma, joq pa? Ýaqyt kórsetedi.
Bıbosynov sózinde tursa deımiz
Olımpıada oıyndarynyń qola júldegeri, 51 kılo salmaqtaǵy sańlaǵymyz Sáken Bıbosynov jartylaı fınalda taılandtyq Zanarat Saendjfetpen qolǵap túıistiredi. Taıland jigiti myqty daıyndyqpen kelgen. Bıbosynovtyń saq bokstasqany, qorǵanysty nyǵyrlaǵany, ara qashyqtyqty durys ustaı bilgeni durys. Sáken keıde shoý jasaǵysy kelip, oınaqtap ketedi. Qarsylasyn ári-beri aınaldyryp júrip, qajet kezinde soqqylaryn daryta bilse, jeńis Sáken jaqta bolatyny sózsiz. Tek, ortada tik turyp tóbelespese bolǵany. Bir anyǵy ol Olımpıadadaǵy qola júldesine álem chempıonatynyń altynyn qosqysy keledi. О́zi solaı degen. Sózinde tursa, shirkin.
Sabyrhanǵa sabyr kerek
54 kılo salmaqtaǵy Mahmud Sabyrhan álem chempıonatynda tamasha boks kórsetip júr. Onyń oqtaýly qoly qarsylastaryn qaımyqtyratyny sózsiz. О́zi «janyp» ketpese, úndi jigiti Akash Kýmar qazaq oǵlanynyń jyldamdyǵyna ilese almaıdy. Onyń ústine osy álem chempıonatynda eń kóp soqqy jumsaýymen daralanǵan da bizdiń Sabyrhan. Dáldik turǵysynan da Mahmudtyń mysy basym. Saýatty judyryqtassa, álem chempıony atanýǵa eń laıyqty boksshymyz da osy jigit.
Serikke ońaı soqpaıdy
Árıne, bolmaǵandy boljaýdyń qajeti joq. Áıtse de, 57 kılo salmaqtaǵy Serik Temirjanovtyń fınalǵa joldama alýy qıyn dep paıymdaımyz. Qarsylasy – kýbalyq Garsııa Kabalerro. Kýbalyq boksshylar qorǵana júrip, ótkir shabýyldar uıymdastyratynyn eskersek, basymdyqty salǵan jerden qolǵa alýǵa tyrysatyn Seriktiń ashyq qalatyn tusy kóp ekenin baǵamdasaq, jeńiske jetý qıyndaı túspek. Bizdińshe Serikke buıyratyny – álem chempıonatynyń qola medali. Sózimizdi joqqa shyǵarsa, bek qýanamyz.
Abylaıhan abaı bolsa deımiz
Ulttyq quramanyń kapıtany Abylaıhan Júsipov jartylaı fınalda japon jigiti Sevonrets Okazavamen qolǵap túıistiredi. Japon boksshysy artyq eshnárse oılap tappaıdy. Ekinshi nómirde judyryqtasady. Abylaıhannyń múlt ketken tusyn utymdy paıdalanyp, qarsy soqqylaryn dóp tıgizýge tyrysady. Sondyqtan Abylaıhan saq bolýy kerek. Qarsylastyń qorǵanysy osal emes. Shabýyly da jaqsy. Árıne, biz Abylaıhanǵa senemiz. Ol álem chempıonatynyń «máńgilik» qola júldegeri bolmaý úshin (eki ret qola alǵan) baryn salar...
Qysqasy, bizdińshe álem chempıonatynyń fınalynda tórt qazaq boksshysy el namysyn qorǵaýy múmkin. Solardyń ekeýi altyn júlde alsa – tamasha tabys. Altyn medal sany odan asyp jatsa, bek qýanyshty bolamyz!