«Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly» Zańyna sáıkes, Qazaqstanda I top múgedegine kútim jasaıtyn adamdarǵa eń tómengi kúnkóris deńgeıiniń 1,4 mólsherinde járdemaqy engizildi, dep habarlaıdy Egemen.kz QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Zańdy iske asyrý úshin QR Densaýlyq saqtaý jáne áleýmettik damý mınıstriniń «Arnaýly memlekettik járdemaqy taǵaıyndaý jáne tóleý qaǵıdalaryn bekitý týraly» 2015 jylǵy 3 maýsymdaǵy №445 buıryǵyna ózgerister men tolyqtyrýlar engizildi.
I toptaǵy múgedekke kútim jasaıtyn adamdar atalǵan járdemaqyny alý úshin «Azamattarǵa arnalǵan úkimet» memlekettik korporasııasynyń bólimshelerine ótinish berip, oǵan kelesi qujattardy qosa tapsyrady:
Jeke basyn kýálandyratyn qujat (jeke kýálik, qandas kýáligi, azamattyǵy joq adamnyń kýáligi, sheteldiktiń turýǵa yqtııarhaty nemese sıfrlyq qujattar servısinen elektrondyq qujat); I toptaǵy múgedekke qorǵanshylyq (qamqorshylyq) belgilengenin rastaıtyn qujat (ondaı derek bolǵan jaǵdaıda); Kútim júzege asyrylatyn adamnyń múgedektigi týraly anyqtama; Sáıkestendirý úshin - járdemaqy berý jónindegi ýákiletti uıymdaǵy bank shotynyń nómiri týraly málimetterdi rastaıtyn qujat; Psıhıkalyq densaýlyq ortalyǵynda esepte turý dereginiń joqtyǵy týraly anyqtama.Kútimdi júzege asyrýshy retinde aıqyndalǵan adamnyń áreket qabilettiligi týraly málimetter jeke basyn kýálandyratyn qujat boıynsha QR Ádilet mınıstrliginiń «Jeke tulǵalardyń memlekettik derekqory» aqparattyq júıesinde tekseriledi.