Qazaqstanda joǵary oqý oryndarynyń 19 dıssertasııalyq keńesi belgilengen talaptardyń saqtalmaýyna baılanysty óz qyzmetin toqtatty. Qazirgi ýaqytta ýnıversıtetterde taǵy 13 dıssovet jabylý aldynda tur, dep habarlaıdy Egemen.kz QR BǴM baspasóz qyzmetine silteme jasap.
Osy jyldyń qyrkúıek aıynda QR BǴM Bilim jáne ǵylym salasyndaǵy sapany qamtamasyz etý komıteti dıssertasııalyq keńesterdiń jumysyna osy jyldyń naýryz aıynda bekitilgen jańa format boıynsha taldaý júrgizdi.
Tekserý barysynda keıbir joǵary oqý oryndarynyń dıssertasııalyq keńesteri jumysty uıymdastyrý kezinde buzýshylyqtarǵa jol beretini anyqtaldy.
«Keńesterde qalyptastyrylǵan doktorantýranyń jeke bilim berý baǵdarlamalarynyń akkredıttelýi joq. Birqatar ýnıversıtetterde keńestiń turaqty quramy bekitilmegen, keńes quramynda ýaqytsha múshelerdiń 50%-y bolýy jónindegi talap saqtalmaıdy. Birqatar dıssovetterde resmı resenzentterdiń, dıssovet músheleriniń ǵylymı jumysty baǵalaýy formaldy sıpatqa ıe. Odan bólek, jumys mazmunyna tolyq taldaý jasalmaıdy», dep atap ótti QR BǴM Bilim jáne ǵylym salasyndaǵy sapany qamtamasyz etý komıtetiniń tóraıymy Gúlzat Kóbenova.
Eske sala ketsek, osy jyldyń naýryz aıynda dıssertasııalyq keńesterdiń jumys isteýi boıynsha jańa talaptar zańnamalyq túrde bekitilgen bolatyn. Olardyń arasynda dıssertasııanyń taqyryby boıynsha maman bolyp tabylatyn ýaqytsha múshelerdiń, resenzentterdiń daýys berýge qatysýy jáne olar úshin shekteýler týraly erejeler bar. Sondaı-aq qorǵaý nátıjeleri boıynsha keńesterge dıssertasııalyq jumysty pysyqtaýǵa nemese qaıta qorǵaýǵa jiberý týraly sheshim qabyldaýǵa múmkindik berildi.