Qaraǵandy - Nur-Sultan tasjolynda bes kólik apatqa ushyrady. Oqıǵa saldarynan eki adam qaza boldy, dep habarlaıdy Egemen.kz.
14 qarashada saǵat 19.20-da Qaraǵandy - Nur-Sultan tasjolynda iri jol apaty boldy. Kóktaıǵaq pen qalyń qardyń áserinen tasjolda birden bes kólik soqtyǵysty. Oqıǵa ornynda alǵan jaraqattardan eki adam qaza tapty. Apat bolǵan jerden túsirilgen vıdeo áleýmettik jelilerde taraldy.
«Bul derekke qatysty QK-niń 345-baby 4-bóligi «Abaısyzda eki jáne odan da kóp adamnyń ólimine ákep soqqan jol qozǵalysy erejesin buzý» boıynsha sotqa deıingi tergeý júrgizilip jatyr. Tıisti saraptamalar taǵaıyndaldy, nátıjeleri boıynsha is júrgizý sheshimi qabyldanady. Qaraǵandy oblysynyń polısııa departamenti júrgizýshilerden jol qozǵalysy erejelerin saqtaýdy suraıdy», dep habarlady Qaraǵandy oblysy PD baspasóz qyzmeti.