Aqmola oblysyndaǵy «Ekaterınbor-Almaty» tasjolynda eki jeńil avtokólik betpe bet soqtyǵysty, dep habarlaıdy Egemen.kz oblystyq PD baspasóz qyzmetine silteme jasap.
Vedomstvonyń málimetinshe, 23 qarashada saǵat 00:10-de Jaqsy aýdandyq PB kezekshilik bólimine Perekatnoe stansııasynyń tusynda, «Ekaterınbor-Almaty» avtojolynyń 967 shaqyrymynda jol-kólik oqıǵasy bolǵany týraly habar keldi.
Anyqtalǵandaı, Qostanaı qalasy baǵytynda júrip bara jatqan «Hyundai Solaris» avtokóliginiń 52 jastaǵy júrgizýshisi kólik tizginin basqara almaı, qarsy baǵytta kele jatqan «Audi V-4» kóligimen betpe bet soqtyǵysty.
Jol apaty saldarynan «Hyundai Solaris» kóliginiń júrgizýshisi men jolaýshysy oqıǵa ornynda kóz jumdy. Al, Atbasar qalasynyń turǵyny basqarǵan «Audi V-4» kóliginiń 59 jastaǵy júrgizýshisi men eki jolaýshysy, sondaı-aq, «Hyundai Solaris» kóliginiń taǵy bir jolaýshysy túrli dene jaraqatymen aýrýhanaǵa tústi.
«Qazirgi ýaqytta osy oqıǵaǵa baılanysty Qylmystyq kodekstiń 345-shi babynyń 4-shi bóligi «kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha sotqa deıingi tergeý bastaldy. Saraptama taǵaıyndaldy», dep qosty vedomstvodan.