Nur Otan partııasy Saıası keńesiniń keńeıtilgen otyrysynda Elbasy Nursultan Nazarbaev táýelsizdigimizdi nyǵaıtyp, el tutastyǵyn saqtap, otbasylyq qundylyqtardy qoldap, ulttyq mádenıetimizdi nasıhattap, tereń bilim men adal eńbekke den qoıý arqyly jasampaz el bolatynymyzdy atap kórsete otyryp, halyqqa «Eldiktiń jeti tuǵyry» qaǵıdattar jıyntyǵyn usynǵany belgili. Búginde osy qaǵıdattar jıyntyǵyn qoǵam jyly qabyldap otyr. Osy oraıda kóptegen otandasymyz redaksııamyzǵa atalǵan «Eldiktiń jeti tuǵyry» qaǵıdattaryna qatysty ystyq yqylasyn bildire kelip, óz oı-pikirlerin joldaýda.
Elbasy Nursultan Nazarbaev Nur Otan partııasy Saıası keńesiniń otyrysynda «Eldiktiń jeti tuǵyry» qaǵıdattar jıyntyǵyn usyndy. Bul qaǵıdattarda birinshi qundylyq retinde Táýelsizdik aıtylady. Shynymen, san ǵasyr boıy halqymyz eliniń azattyǵyn, bostandyǵyn ańsap keldi. Osydan otyz jyl buryn osy uly arman shyndyqqa aınalyp, Egemen elimizdiń ýyǵy qadalyp, shańyraǵy kóterildi. Kún men qyran, aspan beınesindegi kók Týymyz kókte samǵady. Elbasy osy syndarly sátterde ózi bastamashy bolyp, Táýelsiz eldiń erteńi men halqynyń úmitin aqtaý jolynda aıanbaı eńbek etti. Otyz jyldaǵy tabystarymyz – biz úshin maqtanysh. Keshegi qıyn-qystaý kezde el basshysy, onyń halqy tize qosa otyryp, eńseli memleket qurdy. Endi biz osy memlekettiń otyz jyldyq mereıli sátinde ótken jyldardaǵy tabystarymyzdy erteńgi damýymyzdyń bastaýy dep uǵynǵanymyz abzal. Ár qazaqstandyq úshin Táýelsiz elimizdiń órkendeýi, ózge memlekettermen ıyq tirese otyryp, erteńgi bolashaqqa qadam basýy mańyzdy bolmaq. Elbasy aıtqandaı, «Táýelsizdikti nyǵaıtý – ekonomıkany nyǵaıtýdyń negizi». «Jeti tuǵyrdaǵy» alǵashqy qundylyq dep atalǵan Táýelsizdik uǵymy – bizdiń máńgilik qundylyqtarymyzdyń biri.
Al «Eldiktiń jeti tuǵyrynda» «Birlik pen kelisim – eldigimizdiń myzǵymas tuǵyry» delingen. Bul da – bizdiń qazirgi qoǵam úshin aıtylýǵa tıisti sózdiń biri. Árıne, birligi bolmaǵan eldiń damýy da, ekonomıkasy da, ishki yntymaǵy da keri ketedi. Elbasynyń sarabdal saıasaty osy qundylyqty basty nazarda ustap keledi. Dúnıejúzindegi damyǵan elderdiń tájirıbesine kóz salsaq, bári de ishki yntymaqty aldyńǵy orynǵa qoıǵan. Osy ustanym olardyń kún sanap damýyna, eldik pen yntymaqtyń altyn shejiresin jazýynda mańyzdy ról oınady. Uzaq bolashaqty kózdegen Elbasy osy turǵydan memleketimizdiń máńgilik el bolýyndaǵy dara jolyna bereke-birlik arqyly jetýge úndep otyr. Bul – biz úshin der kezinde aıtylǵan oı-tolǵam.
Kelesi qundylyq – jer týraly. Elbasy bul jóninde «Jerden qasıetti eshnárse joq» dep ashyq aıtty. Bul árbir ashyq oıly qazaqstandyqtyń sanasyna tereń uıalaıtyn sóz bolýǵa tıis. Bizdiń babalarymyz «aq naızanyń ushymen, aq bilektiń kúshimen» qorǵap, urpaqtaryna amanattaǵan qasıetti jerimizdi qorǵaý, ony kelesi urpaqqa tabystaý da – biz úshin úlken jaýapkershilik. Egemen elimizdegi ár jas salmaqpen oılaıtyn máseleniń biri de – osy jer máselesi. Elbasy bizdiń elimizdiń shekarasyn shegendep, kórshilermen basyn ashyp, qujat júzinde bekitti. Bul da – Táýelsiz elimizdiń otyz jylyndaǵy mańyzdy tabystardyń biri de biregeıi.
Otbasy, ata-baba dástúri de – osy úndeýdiń ishindegi eń túıindi másele. Qoǵamdaǵy ár otbasy aldymen otbasyn, sosyn Otanyna degen súıispenshiligin tereńdetý úshin ózin damytý kerek dep oılaımyn. Otbasy tynysh adamnyń Otanǵa degen mahabbaty da sheksiz. Qazaq halqynyń dalalyq mádenıetindegi otbasy tárbıesiniń ǵylymı negizdi tustary óte kóp. Ony búgingi qoǵamdyq jaǵdaılarmen birlestire otyryp, sanaly urpaq tárbıeleýge atsalysýymyz kerek.
Al mádenıet týraly kóp aıtýǵa bolady. Jahandaǵy halyqtardyń kóbi mádenıet pen órkenıetke kóńil bólýdi basty másele retinde qaraıdy. HHI ǵasyrdaǵy biz úshin mádenıet aýadaı qajet. Qazaqtyń ulttyq mádenıeti eshkimnen kem emes. Onyń qaınary keshegi ata-babalar jasaǵan erkin zaman, tynysty qoǵam. Biz solardyń asyl mádenıetin jalǵastyrýshylarymyz. Endigi urpaq úshin mádenıetti bolý – zamanǵa saı tulǵa bolýdyń, bilimdi adam bolýdyń alǵysharty.
Bilim týraly da Elbasy óz oıyn hákim Abaıdyń danalyǵymen jetkizdi. Biz qazirgideı ǵylym men tehnıka, bilim qaryshtap damyǵan zamanda jasap otyrmyz. «Bilegi jýan birdi jyǵady, bilimi jýan myńdy jyǵady» dep dana halqymyz aıtqandaı, bilim árqashan qarýdyń eń ozyǵy bolǵan. Bizdiń ultymyzdyń tarıhyndaǵy danyshpandar, el tutqasyn ustaǵan tulǵalar zamanǵa saı bilim alyp, ony eliniń, jeriniń qajetine jumsaǵan. Endigi óskeleń urpaqtyń da ózine, ultyna degen jaýapkershiligi bilimdi bolýdan bastalady.
Básekege qabilettilik kórkeıý jolyna nyqtap kirisken Qazaqstan úshin asa mańyzdy. Jer sharynda jasap jatqan elderdiń bári zamanaýı básekelikke saı jumystar atqaryp, óz eliniń damýyna múmkindikter qarastyrdy. Bul tájirıbeler bizge úlgi bolýy tıis. Memleket úshin de, jeke tulǵa úshin de básekege qabiletti bolýdyń paıdasy zor. Synaqtan keıin árıne jeńis kútip turady. Elbasy óz úndeýinde osy kúlteli máselelerdi eldiń ıgiligi úshin, elimiz ben jerimizdiń alǵa qadam tastaýy úshin aıtqanyn anyq túsinemiz. Úndeýge negiz bolǵan «Eldiktiń jeti tuǵyry» el bolashaǵyna arnalǵan oı-tolǵamdar ekeni daýsyz.
Maqpal TÁJMAǴAMBETOVA,
Májilis depýtaty, Nur Otan partııasy fraksııasynyń múshesi