Vaksına shyǵaratyn birneshe farmasevtıkalyq korporasııa «Omıkrondy» zertteýge kiriskenderin jáne qajet bolǵan jaǵdaıda óz preparattaryn túrlendirýge daıyn ekenin málimdedi, dep habarlaıdy Egemen.kz VVS-ge silteme jasap.
Pfizer jáne Biotech kompanııalary shamamen 100 kún ishinde jańa nusqaǵa qarsy arnaıy beıimdelgen vaksına jasaýǵa jáne shyǵarýǵa daıyn ekenin aıtty.
«Spýtnık V» jasap shyǵarǵan Gamaleı atyndaǵy Máskeý ortalyǵynyń basshysy Aleksandr Gınsbýrg Interfaksqa reseılik ǵalymdar vaksınalaryn jańa nusqaǵa beıimdeýge daıyn ekenin aıtty. Onyń aıtýynsha, aldymen ortalyq osy mýtasııa úshin burynnan bar preparattyń tıimdiligin tekseredi.
«Ondaı modıfıkasııa jasaýǵa bolady. Vaksınany túlendirý tez júzege asyrylady, alaıda onyń tıimdiligin vırýsty beıtaraptandyrý qabiletin anyqtaǵannan keıin ǵana bile alamyz», dedi ol.
Sondaı-aq, Gınsbýrg Gamaleı atyndaǵy ortalyq «Delta» nusqasy shyqqannan keıin «Spýtnık V» vaksınasyn túrlendirmegenin eske saldy. Sebebi, ekpe «83-85-90%-ǵa» tıimdi bolyp shyqty.
Taǵy bir vaksına óndirýshi - Moderna fırmasy bylaı dedi: «2021 jyldyń basynan bastap Moderna-nyń jańa shtammdarǵa baǵyttalǵan muqııat oılastyrylǵan strategııasy bar».
Eske sala ketsek, Ońtústik Afrıka Respýblıkasynda koronavırýstyń jańa mýtasııasy anyqtalǵan edi. Bul nusqa burynǵylarǵa qaraǵanda áldeqaıda juqpaly jáne vaksınalardyń oǵan áseri tıimsiz bolýy múmkin ekendigi aıtyldy. Koronavırýstyń bundaı jańa shtamyna «Omıkron» degen ataý berildi.