Germanııada daýys berý qorytyndysy boıynsha, jańa kansler bolyp sosıal-demokrat Olaf Shols saılandy, dep habarlaıdy Egemen.kz.
Kansler talqylaýsyz jasyryn daýys berý arqyly saılanady. Birinshi kezeńde jeńiske jetý úshin úmitker basym daýys jınaýy kerek. Bul Germanııa Federatıv Respýblıkasynyń qazirgi býndestagynda 736 depýtattyń kem degende 369-y daýys berýi kerek degendi bildiredi.
Al Olaf Shols 395 daýys jınap alǵa shyqty.
Germanııa Federatıv Respýblıkasy býndestagynyń tóraǵasy Berbel Bastyń málimdemesine sáıkes, daýys berýge 707 depýtat qatysyp, úsh bıýlleten jaramsyz dep tanylǵan. Sholstyń kandıdatýrasyna 303 adam qarsy daýys bergen. Rásimge sáıkes, býndestag tóraǵasy Sholske bul daýys berý nátıjelerin qabyldaı ma degen suraqpen júgindi. Saıasatker kelisetindigin málimdedi.
Eldiń ishki tártibine sáıkes, Shols Germanııa Federatıv Respýblıkasynyń Prezıdenti Frank-Valter Shtaınmaıerden resmı taǵaıyndaý alýy kerek, sodan keıin ol ant beredi. Keıin jańa kansler resmı túrde óz mindetine kirisip, prezıdentke kabınet mınıstrleriniń kandıdatýrasyn usynady. Germanııanyń jańa úkimetiniń birinshi otyrysy sársenbide keshke ótedi.
Olaf Shols keıingi úsh jylda Merkel úkimetinde kanslerdiń orynbasary jáne qarjy mınıstri qyzmetin atqarǵan.