QR Premer-Mınıstri Asqar Mamınniń tóraǵalyǵymen Qazaqstan Respýblıkasy Prezıdenti janyndaǵy Sheteldik ınvestorlar keńesiniń aralyq otyrysy ótti, dep habarlaıdy Egemen.kz.
ShIK-tiń ınvestısııalyq saıasatty iske asyrý, energetıka, ekologııa jáne munaı-gaz salasy, eńbek zańnamasy, adamı kapıtaldy damytý jáne sheteldik jumys kúshin tartý, sıfrlandyrý jónindegi birlesken jumys toptarynyń qyzmeti týraly «Sheteldik ınvestorlardyń qazaqstandyq keńesi» qaýymdastyǵynyń basqarma tóraǵasy, «EY» kompanııasynyń Qazaqstan jáne Ortalyq Azııa boıynsha basqarýshy seriktesi Erlan Dosymbekov, «Total Energies Kazakhstan» basshysy Alem Frıga-Noı, «KNAÝF» kompanııasynyń QR-daǵy ókili Dımıtrı Propp, Qazaqstan jáne Ortalyq Azııadaǵy «KPMG» basqarýshy seriktesi Sáken Jumashev baıandady.
Premer-Mınıstrdiń orynbasary – Syrtqy ister mınıstri Muhtar Tileýberdi, Ulttyq ekonomıka mınıstri Áset Erǵalıev, Qarjy mınıstri Erulan Jamaýbaev, Eńbek jáne halyqty áleýmettik qorǵaý mınıstri Serik Shápkenov, Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın, Energetıka mınıstri Maǵzum Myrzaǵalıev, Ekologııa, geologııa jáne tabıǵı resýrstar vıse-mınıstri Ahmetjan Pirimqulov, Densaýlyq saqtaý vıse-mınıstri Jandos Búrkitbaev túsinikteme berdi.
Otyrysqa qatysýshylar jahandyq ekonomıkalyq kún tártibin transformasııalaý jáne onyń baǵytyn pandemııadan keıingi qalpyna keltirýge qaıta baǵdarlaý turǵysynan QR ınvestısııalyq saıasatynyń ózekti máselelerin talqylady.
Asqar Mamın Qazaqstan COVID-19-dyń ekonomıkalyq saldaryn sátti eńsere alǵanyn atap ótti. Bıylǵy 11 aıdyń qorytyndysy boıynsha ekonomıka ósim kórsetip qana qoımaı, sondaı-aq óndiristiń pandemııaǵa deıingi kórsetkishterinen de asyp tústi. Bıylǵy qańtar-qarasha aılarynda JIО́ ósimi 3,8% qurady.
Ekonomıkanyń belsendi qalpyna kelýi aıasynda tikeleı sheteldik ınvestısııalar aǵynynyń artqany baıqalady. 2021 jyldyń birinshi jartysynda QR ekonomıkasyna salynǵan TShI kólemi 30%-dan astamǵa ulǵaıdy.
Sheteldik ınvestısııalardyń eń kóp ósimi aqparat jáne baılanys (9,4 ese), turý jáne tamaqtaný salasyndaǵy qyzmetter (66,1%-ǵa), óńdeý ónerkásibi (57,2%-ǵa) sııaqty salalarda baıqalady.
О́ndirýshi emes sektorlarda negizgi kapıtalǵa salynǵan ınvestısııalar 11%-dan astamǵa ósti. Qurylys (2,1 ese), óńdeý ónerkásibi (+50,5%), aýyl sharýashylyǵy (+40,5%) jáne saýda (+34,2%) salalarynda ınvestısııanyń qarqyndy óskeni baıqalady.
Kóptegen halyqaralyq qarjy uıymdary QR ekonomıkasynyń 2021 jyly 4%-ǵa deıin jáne 2022 jyly 4,5%-ǵa deıin ósýin boljaıdy.
Daǵdarystan keıingi qalpyna keltirýdiń basym strategııalyq baǵyttary retinde Úkimet basshysy ekonomıkanyń ónerkásiptik áleýetin arttyrýdy, jahandyq naryqtarǵa keshendi ıntegrasııalanýǵa járdemdesýdi, aýyl sharýashylyǵy áleýetin damytýdy, sıfrlandyrýdy, ınfraqurylymnyń sapasy men qoljetimdiligin arttyrýdy atady.
Premer-Mınıstr ótken jyly QR Prezıdenti janyndaǵy Sheteldik ınvestorlar keńesiniń gaz jaǵýdan bólinetin shyǵaryndylar úshin aıyppul esepteý kezindegi dıskrımınasııalyq tásildi joıý, sondaı-aq bıznesti salyqtyq quqyq buzýshylyqtar úshin qylmystyq jaýapkershilikke tartý shegin ońtaılandyrý týraly usynystary qoldaý tapqanyn atap ótti.
ShIK-pen birlesip jańa ınvestısııalyq qural – jer qoınaýyn paıdalaný salasyndaǵy jaqsartylǵan modeldik kelisimshart ázirlendi, munaı-gaz salasynda sheteldik ınvestorlarmen jedel ózara is-qımyl jasaý úshin «bir tereze» qaǵıdaty boıynsha Vedomstvoaralyq front-ofıs quryldy, sıfrlandyrý máseleleri boıynsha turaqty jumys toby quryldy.