Táýelsizdik kúni Prıgorodnyı eldi mekeninde jyl boıy jumys isteıtin alǵashqy aýylsharýashylyq jármeńkesi ashyldy. Aýdany 7 myń sharshy metr bolatyn jyly orynda elordanyń, sondaı-aq ózge óńirlerdiń taýar óndirýshileriniń ónimderi usynylady. Azyq-túlik naryq qunynan tómen baǵamen qoıylady, dep habarlaıdy Egemen.kz Nur-Sultan ákimdiginiń resmı saıtyna silteme jasap.
Demalys kúnderi tańǵy saǵat 8-den keshki saǵat 5-ke deıin jurt jármeńkede Aqmola, Pavlodar, Qaraǵandy, Shyǵys Qazaqstan oblystarynyń taýar óndirýshileriniń, sondaı-aq elordalyq taýar óndirýshilerdiń ónimderin satyp ala alady.
«Munda bári óte jaqsy uıymdastyrylǵan, bazar ishi jyly ári jaıly, kelýshiler kóp», dep atap ótti elordalyq Nurjamal Turanova.
Prıgorodnyı eldi mekeniniń turǵyny Gúlsim Qonarova jármeńkege et satyp alýǵa keldi, aıtýynsha baǵasy óte qolaıly.
«Men et alýǵa keldim. Munda et arzan, bazar ishi óte jaqsy, munda jıi kelýge bolady. Qajetti ónimniń bári arzan», dedi ol.
Baǵalar rasymen arzan. Munda sıyr eti – 2000 tg/kg, jylqy eti – 2200 tg/kg, qazy, jaıa 2500 tg/kg satylady.
«Biz kókónis ósiremiz. Jármeńke týraly estigen bette birden ótinish berdik, endi óz ónimderimizdi osynda shyǵaryp otyramyz. Bizde kókónistiń 18 túri bar, bári jańa pisken jáne baǵalary da qolaıly», – dedi satýshy Rústem.
Aıta keteıik, jármeńkede azyq-túlik ónimderiniń barlyq túri – sút, bakaleıa, shujyq, un, jańa aýlanǵan balyq jáne t.b. satylady.
Jármeńke sanıtarlyq normalardy saqtaı otyryp ótkiziledi. Kelýshiler betperde taǵýy, qol gıgıenasyn, áleýmettik qashyqtyqty saqtaýy kerek.
Budan ári jármeńke apta saıyn ár senbi jáne jeksenbi kúnderi myna mekenjaıda ótedi: Prıgorodnyı eldimekeni, Arnasaı kóshesi, 109 ǵımarat.