Shyǵys Qazaqstan oblysy Glýbokoe aýdanynyń ákimi Tamara Rahymjanova qaramaǵyndaǵy qyzmetkerdi sybaılas jemqorlyq úshin sottalǵannan keıin qyzmetinen ketti, dep habarlaıdy Egemen.kz.
Tamara Rahymjanova otstavkaǵa ketkenin Instagram-daǵy paraqshasynda habarlady. Sebebin de sol jerde jazǵan.
«Orynbasarlarymnyń biri sybaılas jemqorlyq qylmysy úshin sottaldy. «Qazaqstan Respýblıkasynyń memlekettik qyzmeti týraly» QR Zańynyń 60-babyna sáıkes, eger taǵaıyndalǵan kúnnen bastap úsh aı ótkennen keıin tikeleı baǵynystylarǵa sybaılas jemqorlyq qylmys jasalǵan jaǵdaıda aýdan ákimi ornynan túsýge ótinish beredi», deıdi Tamara Rahymjanova.
Sonymen qatar, 2021 jyldyń 19 qarashasynda aýdan ákiminiń orynbasaryna qatysty qylmystyq is boıynsha ShQO Apellıasııalyq sotynyń úkimi shyqqanyn habarlady.
«Sottyń aıyptaý úkimi zańdy kúshine engennen keıin Qazaqstan Respýblıkasynyń qoldanystaǵy zańnamasyna sáıkes otstavkaǵa jazbasha ótinish berdim», dedi ol.
Eske salaıyq, aýdan ákimi laýazymyna Tamara Rahymjanova 2020 jyldyń 18 qyrkúıeginde taǵaıyndaldy, buǵan deıin ol О́skemen qalasy ákiminiń orynbasary bolǵan.