Jambyl oblysynyń polıseıleri Almaty qalasyndaǵy ańshylyq dúkenin tonaǵandardy qolǵa túsirdi, dep habarlaıdy Egemen.kz. Polisia.kz saıtyna silteme jasap.
Qordaı aýdany aýmaǵyndaǵy «Almaty-Tashkent» kúre joly boıynda polısııa qyzmetkerleri memlekettik tirkeý nómirinsiz júrgen «Subaru Forester» kóligin toqtatqan. Tekserý barysynda kólik ishinen 12-shi kalıbrli qarýdyń 10 danasy, 1 pnevmatıkalyq tapansha jáne ańshylyqqa arnalǵan quraldar shyqqan.
Avtokóliktiń 24 jastaǵy júrgizýshisi men 27 jastaǵy jolaýshysy Almaty qalasyndaǵy jappaı tártipsizdikter kezinde ańshylyq dúkenin tonaǵany belgili boldy. Búginde QR Qylmystyq kodeksiniń 291-babynyń 3-bólimimen sot aldyndaǵy tergeý amaldary júrgizilýde.