Elde bolyp jatqan tótenshe ahýal kezinde bank sektorynyń jaǵdaıy turaqty. Qarjy naryǵyn retteý jáne damytý agenttigi osylaı dep habarlady. 2021 jyldyń sońynda bank sektorynyń aktıvteri 36,7 trln teńgeni quraǵan. Agenttik málimetinshe, halyq pen korporatıvtik klıentter úshin qyzmet kórsetýge bank salasy tolyqqandy ázir. Menshik kapıtaly men ótimdiliktiń aıtarlyqtaı qory osyǵan múmkindik beredi.
Dál qazirgi sátte bank sektorynyń menshik kapıtaly – 4,6 trln teńge. Jalpy, kapıtal jetkiliktiligi zańnamada kórsetilgen talaptan 3 ese asady. О́timdiligi joǵary aktıvter 12,3 trln teńgeni quraıdy. Bul – jalpy aktıvterdiń 33,4 paıyzy.
«Aqsha-kredıt saıasatyn iske asyrý sheńberinde bank sektory ótimdiliginiń qosymsha qoryn qurý maqsatynda Ulttyq bank tikeleı jáne keri REPO operasııalaryn, depozıttik aýksıondy, qysqa merzimdi nottardy shyǵarýdy qosa alǵanda, ekinshi deńgeıli bankterde ótimdilikti berý jáne alyp qoıý jónindegi kúndelikti operasııalardy qaıta bastaıdy. Qajet bolǵan jaǵdaıda, aqsha naryǵynda Qazaqstan qor bırjasynda 3 aıǵa deıingi merzimge REPO jáne svop operasııalary arqyly ótimdilikpen shuǵyl qamtamasyz etý tetigi qoldanylady», delingen agenttik habarlamasynda.
Olardyń aıtýynsha, bank salymshylary úshin táýekel joq. Qandaı jaǵdaıda da bankte jınaqtalǵan azamattar aqshasyna «Qazaqstannyń depozıtterge kepildik berý qory» AQ kepildik beredi. Sonymen qatar qarjylyq qyzmetterdi tutynýshylardyń quqyqtaryn qorǵaýdy qamtamasyz etý maqsatynda bank sektoryndaǵy jaǵdaıdy kúsheıtilgen túrde monıtorıngteý jalǵasa bermek.
Otandyq ekinshi deńgeıli bankter de birtindep óz qyzmetteri týraly málimdeme jarııalap jatyr. 10 qańtar kúni Halyk Bank búkil Qazaqstan aýmaǵynda (Almaty, Almaty oblysy jáne Taldyqorǵannan basqa óńirlerde) 297 bólimshesiniń jumysyn iske qosty. О́ńirlerdegi ahýalǵa baılanysty jumys ýaqyty tańǵy 9:00-den keshki 17:00 nemese 18:00-ge deıin jalǵasady. Bank qyzmetine qatysty naqty aqparatty 7111 nómirine habarlasyp alýǵa bolady.
«Bank Hoým Kredıt» te bank servısine qoljetimdilik ashylǵanyn jarııa etti. Banktiń mobıldi qosymshasy ınternetsiz jumys isteı beredi. Sondyqtan atalǵan bank kartasy arqyly kez kelgen tólemdi tóleýge múmkindik bar. 9:00-21:00 aralyǵynda 7373 jáne 7979 nómiri arqyly kontakt-ortalyq jumys isteıdi.
Bankterdiń qalypty rejimge qaıta oralýyna baılanysty bankomattar jumys istep, termınaldar qosyla bastady. «Bank SentrKredıt» te el boıynsha 71 bólimshesiniń jumysqa kiriskenin habarlady. 9:00-16:00 aralyǵynda jeke jáne zańdy tulǵalarǵa qarjylyq qyzmetterdiń keń spektri usynylady. PR-qyzmetiniń habarlaýynsha, Almatyda banktiń 7 bólimshesi, 9 bankomaty jáne 9 tólem termınaly búlingen. Olardy jóndep, tez arada iske qosý úshin qarjy ınstıtýty kúsheıtilgen rejimde jumys istep jatyr. Soǵan baılanysty bank ázirge bıznes-klıentterge ǵana qyzmet kórsetedi. Bank qyzmetine qatysty jeke tulǵalar 505, zańdy tulǵalar 605 nómirine habarlasyp, aqparat alýyna bolady.
«Bank SentrKredıt» AQ basshysy Ǵalym Qusaıynov qazir barlyq servıstiń iske qosylǵanyn, tipti sheteldegi qazaqstandyqtar da bank qyzmetin paıdalana alatynyn habarlady. Alaıda ol úshin Kcell nemese Beeline mobıldi ınterneti arqyly qosylý qajet.
«TJ kezinde barlyq nesıe boıynsha aıyppul men ósimpul eseptemeımiz. 19 qańtarǵa deıin nıet bildirýshi azamattardyń nesıe tólemin keıinge qaldyrý ótinishin oryndaımyz. ShOB kásipkerleri úshin nesıe tólemin uzaq merzimge keıinge qaldyrý kómegin usynamyz jáne nesıe boıynsha árbir usynysty jeke qarastyramyz. Qyzmetin oryndaý kezinde qaza tapqan barlyq áskerılerdiń nesıeleri keshiriledi. Olardyń otbasyna bank atynan 1 mln teńge kóleminde ótemaqy tóleımiz», deıdi bank basshysy.
«Sberbank» mobıldi qosymshasy da ınternetsiz jumys istep tur. SMS habarlamany jetkizýdiń bógelýine baılanysty aýdarym operasııalaryn rastaýǵa shekteý alynyp tastalǵan. TJ kezinde SMS rastaýsyz bir rettik aýdarym somasy 49 999 teńgeni quraıdy. Almaty men Almaty oblysynan ózge aımaqtardaǵy bas keńselerde bankomattar tolyq jumys istep tur. Bul bank te antıterrorlyq operasııa kezinde qaza tapqan quqyq qorǵaý organdary qyzmetkerleri men áskerı qyzmetkerlerdiń nesıelerin keshiredi. Sonymen qatar aı sońyna deıin jeke jáne zańdy tulǵalardyń barlyq nesıesi boıynsha aıyppul men ósimpuldar eseptelmeıdi.
Freedom Finance Bank te osyndaı sharalardy qolǵa alǵanyn málim etti. Mobıldi qosymsha jumysy qalypqa keltirildi, qazirgi kezde kartadan jeke tulǵalar kartasyna aýdarym jasaýǵa tolyq múmkindik bar. Internettiń joq ekenine qaramastan, saýda oryndarynda POS-termınaldarda bank kartasymen tólem jasaýǵa bolady. Tıisinshe, banktiń kez kelgen bankomatynan aqsha sheship alý turǵysynan da qıyndyq joq. Banktiń habarlaýynsha, fılıaldar men bankomattar jumysyn tolyq qalpyna keltirý jaqyn arada aıaqtalmaq. Mazalaǵan saýaldarǵa jaýap alý úshin 5595 nómirine habarlasý jetkilikti.
Al Kaspi-diń eń alǵashqy bolyp ınternetsiz mobıldi qosymshany iske qosqany belgili. Banktiń mobıldi qosymshasynan qarjylyq qyzmetterdi júzege asyryp hám tutynyp qana qoımaı, memlekettik jańalyqtardy da oqyp otyrýǵa bolady.
«Alfa-Bank» te 10 qańtardan bastap fılıaldardy ashty. Banktiń habarlaýynsha, qarjy ınstıtýty óz qyzmetkerleri men klıentteriniń qaýipsizdigi úshin kúsheıtilgen kúzetpen jumys isteıdi. Klıentter mobıldi qosymshany qoldana alady, ınternet-bankıng pen karta tólemi de qoljetimdi. Bankomattar aqsha berýge daıyn. Bank qyzmetine qatysty suraqpen 2051 nómirine habarlasýǵa bolady. Al Almatydaǵy Respýblıka alańynda ornalasqan Bank RBK-nyń bas keńsesi terrorlyq áreket kezinde qatty zardap shekken. Bas keńse tonalyp, alty qabatty ǵımarattyń áýelgi úsh qabaty janyp ketken.
«Ákimshilik ǵımarattyń búlingenine qaramastan, klıentter qarjysyna zııan kelgen joq. Jappaı tártipsizdik kezinde banktiń senimdi qorǵalǵan depozıtarııi zardap shekpedi. Shtatty rejimdegi jumysqa tez oralý úshin bank bar kúshin salyp eńbek etýde», dep habarlady baspasóz qyzmeti. Osy bankterdiń barlyǵy, sondaı-aq «Eýrazııalyq bank» jáne Jusan Bank qaza tapqan áskerıler nesıesin keshiretinin, TJ kezinde azamattarǵa aıyppul men ósimpul eseptemeıtinin jetkizdi.
Bul rette Qazaqstannyń depozıtterge kepildik berý qorynyń da depozıtter boıynsha maksımaldy stavkany kótergenin aıta ketken abzal. 2022 jyldyń 11 qańtarynan bastap standartty óteý merzimi 3 jáne 6 aı jınaq salymdary boıynsha eń joǵary syıaqy mólsherlemesi 2 paıyzǵa, al 12 aı standartty óteý merzimi bar jınaq salymdary boıynsha 1 paıyzǵa ulǵaıtyldy. «QDKBQ tótenshe jaǵdaıǵa baılanysty agent bankterdiń kepildik berilgen ótemdi tóleýge ótinishter qabyldaýy osy agent bankterdiń bólimsheleriniń jumys rejimine baılanysty bolatyndyǵyn habarlaıdy», delingen habarlamada.
Ulttyq bank jáne Qarjy naryǵyn retteý jáne damytý agenttigi áleýmettik jeli men messendjerlerde taraǵan «azamattar nesıesi keshiriledi» degen aqparattyń shyndyqqa janaspaıtynyn aıtyp, tek senimdi derek kózderine senýge shaqyrady.