Pavlodarda 18 jyl boıy memleketaralyq izdeýde júrgen er adam ustaldy, dep habarlaıdy Egemen.kz.
Bul týraly Polisia.kz saıty málim etti.
Saıt málimetinshe, Qazaqstannyń 59 jastaǵy azamaty 2003 jyly shildede Reseı Federasııasynyń memlekettik shekarasyn zańsyz kesip ótti degen kúdikke ilingen.
«Sol kezde er adamdy Reseı Federasııasynyń FSB qyzmetkerleri ustaǵan, Reseı Federasııasynyń Qylmystyq kodeksiniń 322-baby 1-bóligi boıynsha qylmystyq is qozǵaldy, er adamnan «eshqaıda ketpeý týraly qolhat» alynǵan. Alaıda sol kezde 40 jasta bolǵan er adam Qazaqstanǵa ketip qalǵan. Osy jyldar ishinde izdestirilip jatqan qylmysker Pavlodar qalasynda turǵan», dedi Pavlodar oblysy Polısııa departamentiniń baspasóz qyzmeti ókilderi.
Er adam memleketaralyq izdeýde júrgeni týraly aqparatty Reseı Federasııasynyń quqyq qorǵaý organdary bergen.