Bir top áskerıler Býrkına-Faso prezıdenti Roke Mark Krıstıan Kaboreni qamaýǵa aldy, dep habarlaıdy Egemen.kz Anadoly agenttigine silteme jasap.
Kýágerlerdiń aıtýynsha, 24 qańtar kúni tańerteń Býrkına-Faso prezıdentiniń Ýagadýgý qalasyndaǵy rezıdensııasynyń mańynda atys dybystary estilgen.
Esterińizde bolsa, 23 qańtarda Ýagadýgý qalasyndaǵy eki áskerı kazarmada atys bolǵany jaıly habarlaǵanbyz.
Osydan keıin buqaralyq aqparat quraldarynda kóterilis boldy degen málimdemeler paıda boldy. Biraq úkimet bılikti qarýly basyp alý áreketin joqqa shyǵarǵan edi.
Býrkına-Fasonyń Qarýly kúshter mınıstri Bartelemı Sımpora jaǵdaıdyń baqylaýda ekenin aıtty.
Bılik ókilderiniń aıtýynsha, sarbazdar memlekettik tóńkeris jasaý maqsatymen emes, eńbek jaǵdaıyn jaqsartýdy talap etip kóteriliske shyqqan.
Osyǵan baılanysty el boıynsha mobıldi ınternet ajyratyldy.
Artynsha bir top azamat kóshege shyǵyp, úkimettiń «Progress halyqtyq qozǵalysy» partııasynyń keńsesine shabýyl jasady.
Shabýyldan keıin el boıynsha saǵat 20:00-den 05:30-ǵa deıin komendanttyq saǵat jarııalandy.
Býrkına-Fasodaǵy oqý oryndarynda sabaq eki kúnge toqtatyldy.