Qosshy qalasynda Memlekettik kirister basqarmasy quryldy. Bul týraly QR Qarjy mınıstrliginiń memlekettik kirister komıteti málim etti, dep habarlaıdy Egemen.kz.
Jańadan qurylǵan basqarma qala ortalyǵynda Respýblıka kóshesi, 3/3 úıde ornalasqan. Aýdany 200 sharshy metrdi quraıdy. Bıznes úshin qolaıly jaǵdaı jasaý aıasynda jańa memlekettik organ «Open space» formatynda jumys isteıdi.
Salyq tóleýshilerdiń qolaılylyǵy jáne memlekettik qyzmetterdi sapaly kórsetý úshin salyq eseptiligin qabyldaý ortalyǵynda elektrondyq kezek júıesi jáne halyqqa qyzmet kórsetý salasyndaǵy basqa da zamanaýı sıfrlyq sheshimder qoldanylǵan.
Qosshy qalasynda basqarma tirkeýge jatatyn salyq tóleýshilerdiń jalpy sany - 22 myń adam.
Sonymen qatar, esepke turý úshin salyq tóleýshilerge eshqandaı ótinish jiberýdiń qajeti joq, bári avtomatty túrde júrgiziledi.
«Shtat sany 12 qyzmetkerdi quraıdy. Memlekettik kirister basqarmasynyń quramynda 3 bólim – salyq tóleýshilermen jumys bólimi, salyqtyq baqylaý jáne óndirip alý bólimi, sondaı-aq esep, taldaý jáne uıymdastyrý-quqyqtyq jumys bólimi jumys isteıdi. Olar memlekettik qyzmettiń 44 túrin kórsetedi. Búgingi tańda 400-den astam salyq tóleýshi túrli máseleler boıynsha túsinikteme aldy. Jańa memlekettik kirister organy osy jyly bıýdjetke 1,4 mlrd teńgeden astam salyq jınaýdy josparlap otyr», dep atap ótedi komıtetten.
Aıta keterligi, buǵan deıin qala turǵyndary memlekettik qyzmetterdi alý úshin Qosshydan 60 shaqyrym qashyqtyqta ornalasqan Selınograd aýdanynyń Aqmol selosynyń aýdan ortalyǵyna júginýi qajet bolatyn.