Qostanaı oblysy Arqalyq qalasyndaǵy dala ólkesi tarıhı mýzeıinde saq dáýirine jatatyn altyn búrmeli buıym saqtalǵan. Bul − jádiger Qaratorǵaı ózeniniń boıyndaǵy Jańaqala aýylynan tabyldy.
Zertteýshiler qundy jádigerdi bizdiń zamanymyzǵa deıingi 500-600 jyldarǵa jatatyn saq dáýiriniń murasy deıdi. Saq dáýirinde qoldanbaly óner jaqsy damyp, ásirese altyn buıymdardy zergerlik isine paıdalaný keń etek alǵan.
Jádigerdiń sıpaty men jasalý ereksheligine qaraı ony «Búrmeli altyn syrǵa nemese saqına» dep ataýǵa bolady. Syrǵanyń salpynshaq bóliginde qumyra pishindes 20 usaq búrshik búrmelengen. Bir qaraǵanda, bul búrmeler bıdaı dánine uqsaıdy. Jádigerdiń salmaǵy – 20 gramm, taza altynnan jasalǵan, sheńberiniń dıametri – 2,9 sm, eni – 8 mm, buıymnyń negizgi bıiktigi – 5,4 sm, qumyraǵa uqsas búrshikterdiń bıiktigi – 9 mm, onyń dıametri – 6-6,1 mm, qumyra aýzynyń bıiktigi – 1 mm, dıametri – 2,5 mm.
Altyn buıymdy murajaı qoryna mesenat Sapar Ysqaquly jasaqtaǵan ekspedısııa músheleri men elordadaǵy Ulttyq mýzeı janynan qurylǵan «Halyq qazynasy» ǵylymı-zertteý ınstıtýtynyń basshysy Ahan Ońǵaruly tapsyrǵan.