Tórtkúl dúnıe jankúıerleri taǵatsyzdana kútken XXIV Qysqy Olımpııa oıyndarynyń ashylý rásimi juma kúni Qytaıdyń bas shahary – Beıjińdegi ulttyq stadıonda ótti. Halyq arasynda «Qustyń uıasy» degen ataýǵa ıe bolǵan záýlim sport kesheninde uıymdastyrylǵan saltanatty sharaǵa kóptegen eldiń basshylarymen qatar Qazaqstan Respýblıkasynyń Prezıdenti Qasym-Jomart Toqaev ta qatysty. Ashylý saltanatynda memlekettik týymyzdy Tumar hansha beınesindegi konkıshi qyz Ekaterına Aıdova men qazaq batyrynyń keıpindegi short-trek sheberi Abzal Ájiǵalıev ustap shyqty.
Senbide sporttyń alty túrinen básekeler ótip, alǵashqy júldeler jıyntyǵy sarapqa salyndy. Atap aıtsaq, shańǵyshylardyń áıelder arasyndaǵy skıatlonynda Tereza Iohaýgqa teń keler eshkim tabylmady. Bir ǵajaby, 33 jastaǵy Norvegııanyń maqtanyshy sonaý 2010 jyly Vankýverde alaýy tutanǵan Olımpııa oıyndarynda altynnan alqa taqqan edi. 2014 jyly Sochıde ol kúmis pen qolany qanaǵat tutty. 2018 jyly Phenchhanda Terezanyń joly bolmady. Mine, endi araǵa 12 jyl salyp, jeńis tuǵyrynyń eń bıik satysyna qaıta kóterildi. Bul joly Iohaýgta óziniń basty qarsylasy reseılik Natalıa Neprıaevadan 30,2 sekýnd ozdy. Qola medal aýstrııalyq Tereza Shtadloberge buıyrdy. Qazaqstandyqtar arasynda eń úzdik nátıje Ksenııa Shalygına men Angelına Shýrygaǵa tıesili. Olar 48 jáne 49-oryndardy qanaǵat tutty.
Norvegııanyń qorjynyna ekinshi altyndy bıatlonshylar saldy. Aralas estafetada Marte Ýlsbıý-Roıselann, Tırıl Ekhoff, Tareı Bo jáne Iohannes Bo syndy talaı dúbirli dodalarda ysylǵan dúldúlderge senim artqan komanda Aspanasty elinde aldyna jan salmady. Fransııa men Reseı quramalary ekinshi jáne úshinshi oryndardy ózara bólisti.
Konkıshi qyzdar 3 000 metrlik qashyqtyqta saıysqa tústi. Bul básekede bizdiń Nadejda Morozova 3:59,647 sekýndtyq kórsetkishpen 21 jyl boıy murty buzylmaı turǵan Qazaqstan rekordyn jańartty. Burynǵy rekord áıgili Lıýdmıla Prokashevaǵa tıesili edi. Biraq sonyń ózi úzdikter qataryna qosylý úshin jetkiliksiz boldy. Morozova nebári 13-orynǵa turaqtady. Al bas júldeni Phenchhan Olımpıadasynyń qola júldegeri, álemniń tórt dúrkin chempıony, nıderlandııalyq Iren Shaýten oljalady. Italııalyq Francheska Lollobrıdjıda kúmis alsa, kanadalyq Izabel Vaıdemann qola medaldy moınyna ildi.
National Speed Skating Oval kesheninde ótken básekeler jaıynda áńgimelegende myna bir jaıtqa nazar aýdarmaýǵa bolmas. Joǵaryda atalǵan qashyqtyqta áıgili nemis konkıshisi Klaýdııa Pehshtaın da óner kórsetti. 22 aqpanda ol mereıli 50 jasqa tolǵaly otyr. Bul joly jalyndy jastar ardagerge shań qaptyryp ketti. Qytaıda týyp-ósken qazaq qyzy Aqnar Ardaqtyń dál sol Pehshtaınmen birge birinshi jupta júgirip, odan ozyp ketkenin aıta ketsek, esh aıyby joq dep oılaımyz. Desek te, Klaýdııanyń esimi Qysqy Olımpııa oıyndaryna qatysqan eń qart sportshy retinde tarıhta qaldy. Biraq Germanııa ókiliniń ótkenge esh ókpesi joq dep oılaımyz. О́ıtkeni sporttyń bul túrinde Pehshtaınnyń baǵyndyrmaǵan belesi joq. Aq Olımpıadaǵa segiz márte qatysqan ol 5 altyn, 1 kúmis jáne 2 qola medaldy oljalady. Álem chempıonatynda 11 ret (1 altyn, 8 kúmis, 2 qola) jeńis tuǵyryna kóterildi. Jekelegen qashyqtyqtar boıynsha ótken dúnıejúzilik dodada 30 ret (5 altyn, 13 kúmis, 12 qola) olja saldy. Mine, osy derekterdiń ózi-aq nemis halqynyń baǵyna týǵan Klaýdııa Pehshtaınnyń qandaı ǵalamat sportshy bolǵanyn aıqyndap turǵany anyq.
Short-trekten Qazaqstan quramasy aralas estafetalyq saıysty altynshy orynmen qorytyndylady. Bizdiń komanda sapynda Iаna Han, Olga Tıhonova, Denıs Nıkısha jáne Abzal Ájiǵalıev óner kórsetti. Biraq fınalda kanadalyqtar jarystan shettetilgendikten jerlesterimiz besinshi orynǵa kóterildi. Bul básekede Qytaı sportshylarynyń baǵy jandy. Osy oraıda tóreshilerdiń olarǵa búıregi burǵanyn da aıta ketýge tıispiz. Negizi jartylaı fınalda jarys qojaıyndaryna tórtinshi orynda qalyp qoıǵan edi. Alaıda «erejeni buzdy» degen jeleýmen qazylar AQSh pen Reseı short-trekshilerin jarys jolynan shettetip, qytaılyqtardy fınalǵa jetektep shyǵardy. Biraq báribir Aspanasty eliniń ókilderi myqtylyǵyn moıyndamasqa laj joq. Aqtyq synda aıshyqty óner kórsetken Qytaıdyń short-trekshileri bas júldeni oljalady. Ekinshi oryndy Italııa ıelense, Majarstan úshinshi satyǵa taban tiredi.
Shańǵymen tramplınnen sekirýden áıelderdiń saıysy sensasııalyq nátıjemen aıaqtaldy. Birqatar ataqty sportshylarǵa san soqtyrǵan Ýrsa Bogataı Beıjiń kóginde Slovenııanyń ánuranyn shyrqatsa, onyń komandalyq áriptesi Nıka Krıjnar qolaǵa qol sozdy. Al osy jarystyń basty favorıtteriniń biri – Olımpıadanyń kúmis júldegeri, álemniń tórt dúrkin chempıony Katarına Althaýs ekinshi orynda qalyp qoıdy.
Frıstaıl-mogýldan ótken jarysta da esimi kópshilikke beımálim 21 jastaǵy Shvesııanyń ókili Valter Vallberg top jardy. Odan keıingi oryndardy Phenchhan olımpıadasynyń jeńimpazy, kanadalyq Mıkael Kıngsberı men japonııalyq Ikýma Hırosıma enshiledi. Elimizdiń eń úzdik frıstaılshysy Dmıtrıı Reıherd segizinshi oryndy qanaǵat tutty.
Olımpııa oıyndarynyń alǵashqy júldeleri sarapqa salynǵan senbi kúni bes eldiń órenderine bas júlde buıyrdy. Kósh basynda – Norvegııa. Skandınavııa túbeginen kelgen saıypqyrandar eki altyndy ıelendi. Slovenııa bir altyn men bir qolany qorjynǵa saldy. Qytaı, Nıderland jáne Shvesııanyń da ánurany bir-bir retten shyrqaldy. Al Reseı sportshylary bir kúmis pen bir qolaǵa qol jetkizdi.