Túrkııa Respýblıkasynyń Prezıdenti Rejep Taıyp Erdoǵan Ystanbulda Túrki memleketteri uıymy Aqsaqaldar keńesiniń múshelerimen kezdesti, dep habarlaıdy Egemen.kz.
Alqaly jıynǵa Qazaqstan tarapynan osy keńestiń múshesi Ikram Adyrbekov qatysty. Túrkııa Prezıdenti R.Erdoǵan Aqsaqaldar keńesiniń múshelerin jyly yqylaspen qarsy alyp, keńestiń róli men atqaratyn jumysy týraly pikirimen bólisti. Túrkııa Prezıdenti óz sózinde 2021 jyly qarashada Ystanbulda ótken Túrki memleketteri basshylarynyń sammıtinde Aqsaqaldar keńesiniń dárejesin kóterip, jumysyn jandandyrý týraly ortaq sheshim qabyldanǵanyn jáne osy Keńeske jetekshilik etý senimdi áriptesi, Túrkııanyń burynǵy premer-mınıstri Bınalı Iyldyrymǵa tapsyrylǵanyn atap ótti.
Jıynda túrki halyqtarynyń ejelden tabıǵatynda bar úlkendi syılaý, sózin, aqyl-keńesin tyńdaý dástúrin, mádenıeti men qundylyqtaryn saqtaý, dáripteý, damytý ortaq paryzymyz ekeni aıtyldy. Sonymen qatar álemde barlyq baǵytta kúrdeli, shıelenisken máseleler kóbeıgenin alǵa tartqan Túrkııa basshysy bul syn-tegeýrinderdi Túrki memleketteri uıymy músheleri birlesip sheshkeni durys degen pikir bildirdi. Ol úshin baýyrlas elder arasyndaǵy dostyqty, yntymaqtastyqty arttyryp, damytý kerek. R.Erdoǵan Túrkııa uıymnyń búgingi tóraǵasy retinde osy baǵytta qarqyndy jumys atqaratynyn aıtyp, sózin qorytyndylady.
Kezdesýde sóz alǵan Qazaqstan ókili Ikram Adyrbekov Túrkııa Prezıdenti Rejep Erdoǵanǵa qazaqstandyqtar atynan zor densaýlyq tileı otyryp, Aqsaqaldar keńesiniń múshelerimen kezdesý ótkizgenine alǵys bildirdi. Ol sondaı-aq Ystanbulda ótken jıynnyń negizgi qorytyndysy jaıly aıta kelip, baýyrlas Qazaqstan men Túrkııa elderiniń ózara qarym-qatynasyna toqtaldy. Qazaqstan ókili eki el arasyndaǵy saýda-ekonomıkalyq baılanystyń qarqyndy damyp kele jatqanyna toqtalyp, pandemııa kezinde báseńdep qalǵan ekijaqty qarym-qatynasty barlyq baǵyt boıynsha qaıta jandandyrýǵa shaqyrdy.
Rejep Erdoǵan Qazaqstan Prezıdenti Qasym-Jomart Toqaevqa sálemi men arnaıy shaqyrýyn jetkize otyryp, bıyl kóktemde Túrkııaǵa resmı saparmen keletinine senim bildirdi.
Aı basynda Túrkııa basshysy Ýkraınaǵa saparynan keıin omıkron vırýsyn juqtyryp, syrqattanyp qalǵany habarlanǵan-dy. Qazaqstan Prezıdenti áriptesiniń tezirek saýyǵyp ketýin tilep hat joldaǵan edi, oǵan R.Erdoǵan rızashylyǵyn bildirgen.
Eske salsaq, 9 aqpan kúni Ystanbulda Túrki memleketteri uıymy Aqsaqaldar keńesiniń 12-shi otyrysy ótti. Úsh kúnge sozylǵan jıynda Túrki memleketteri uıymyna múshe memleketterdiń ókilderi bas qosyp, keńestiń maqsat-mindetterin talqylap, keleshektegi jumys josparyn aıqyndaǵan.