QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda QR Prezıdenti Qasym-Jomart Toqaevtyń bıylǵy 8 aqpandaǵy Úkimettiń keńeıtilgen otyrysynda bergen tapsyrmalaryn oryndaý jónindegi sharalar qaraldy, dep jazady Egemen.kz QR Premer-Mınıstriniń baspasóz qyzmetine silteme jasap.
«Memleket basshysy Qasym-Jomart Kemeluly Toqaev elimizdiń osy jylǵa arnalǵan negizgi áleýmettik-ekonomıkalyq damý basymdyqtaryn aıqyndap berdi. Úkimettiń eń mańyzdy mindetteriniń biri – halyqtyń tabysyn arttyrý jáne jańa jumys oryndaryn qurý», dedi Á. Smaıylov.
QR Prezıdentiniń tarıftik josparlar jónindegi tapsyrmasyn oryndaý aıasynda monopolıst operatorlar men deldaldar alyp otyrǵan tarıfter men komıssııalarǵa bir aı ishinde taldaý júrgizip, olardy qaıta qaraý nemese alyp tastaý jóninde sheshimder daıyndaý tapsyryldy.
Premer-Mınıstr Memleket basshysynyń tapsyrmalaryn iske asyrý aıasynda taý-ken sektorynda paıdaly qazbalardy óndirýge salynatyn salyq mólsherlemesin, munaı ónimderin óndirýshilerge arnalǵan aksızderdi, jer qoınaýyn paıdalanýshylardyń dıvıdentteri boıynsha jeńildikterdi jáne transferttik baǵa belgileý tártibin qaıta qaraý boıynsha usynystar ázirlengenin atap ótti.
Kóktemgi egis jumystaryn júrgizý jáne dıqandardy arzandatylǵan dızel otynymen, tuqymmen, tyńaıtqyshtarmen jáne pestısıdtermen qamtamasyz etý máselesine erekshe nazar aýdaryldy.
Qomaqty memlekettik qarjylandyrý men kórsetiletin memlekettik qoldaý sharalaryna qaramastan, Arnaıy ekonomıkalyq aımaqtardyń el ekonomıkasyna qosyp otyrǵan úlesi óte tómen deńgeıde qalyp otyr.
«Basqarýshy kompanııalardyń jumysy tıimsiz. Áleýetti ınvestorlar arnaıy ekonomıkalyq aımaqtarǵa kirý, qajetti ınfraqurylymnyń bolmaýy, basqarýshy kompanııalardyń salǵyrttyǵy sııaqty únemi túrli kedergilerge tap keledi», dep Álıhan Smaıylov, tekseris júrgizip, 1 naýryzǵa deıin naqty usynystar ázirleýdi tapsyrdy.
Taýarlyq jáne suıytylǵan gaz óndirisin ulǵaıtý, sondaı-aq munaı-gaz salasyndaǵy ınvestorlar úshin yntalandyrý sharalaryn ázirleý maqsatynda Úkimet basshysy bir aı ishinde Úkimetke tıisti zańnamalyq túzetýler toptamasyn engizýdi tapsyrdy.
«Resýrstyq bazany ulǵaıtý máselesi óte ózekti bolmaq. Negizgi basymdyq – ishki naryqty, onyń ishinde kásiporyndardy gazdandyrý», dedi Premer-Mınıstr otyrys barysynda.
Sonymen qatar Mınıstrler kabınetiniń basshysy aýrýhanalar salý boıynsha memlekettik-jekemenshik áriptestik jobasynyń biryńǵaı jáne ońtaıly nusqasyn ázirleýdi, shuǵyl túrde «SQ-Farmasııa» bazasynda medısınalyq tehnıkany bir ortalyqtan satyp alý, onyń ishinde óndirýshilerden búkil paıdalaný merzimine servıs usyna otyryp, tikeleı satyp alý máselelerin pysyqtaýdy tapsyrdy.
«Satyp alýdyń ashyqtyǵyn qamtamasyz etý úshin bul prosesti tolyǵymen avtomattandyrý qajet», dedi QR Premer-Mınıstri.
«Qazirgi jaǵdaıda biz judyryqtaı jumylyp, naqty nátıje kórsetýimiz qajet. Bizdiń basty mindetimiz – halyqtyń tabysyn arttyrý jáne turmys sapasyn jaqsartý. Sonymen qatar básekege qabiletti jáne ártaraptandyrylǵan ekonomıkany damytýǵa kúsh salýymyz qajet», dedi Á. Smaıylov.